Թուրքական Milliyet թերթը, վկայակոչելով ամերիկյան The New York Times թերթի՝ Սպիտակ տան աղբյուրին, հայտնում է, որ Թուրքիայի տարածքում տեղակայվելիք ՆԱՏՕ-ի ռադիոտեղորոշիչ կայանից (ՌՏԿ) ստացված տվյալները հաղորդվելու են նաև Իսրայելին.
«Թուրքիայի տարածքում ՌՏԿ-ի տեղակայումը վերջին 20 տարիներին Վաշինգտոնի և Անկարայի միջև ռազմական համագործակցության շրջանակներում արված առավել նշանակալից նախագիծն է։ ԱՄՆ-ի և Թուրքիայի միջև կնքված այդ համաձայնագիրն ամենանշանակալից քայլն էր՝ սկսած 2003 թվականի իրաքյան պատերազմից։ Այն ժամանակ Թուրքիայի խորհրդարանն ԱՄՆ-ին արգելեց իր երկրի տարածքն օգտագործել Իրաքին հարված հասցնելու համար։
Հակահրթիռային պաշտպանության (ՀՀՊ) ոլորտում համագործակցությունը կբարձրացնի Թուրքիայի անվտանգությունը և կամրացնի ՆԱՏՕ-ի իր դաշնակիցների հետ Անկարայի կապերը։ Մյուս կողմից էլ ԱՄՆ-ի համապատասխան կառույցներն Իսրայելին են փոխանցելու Թուրքիայի տարածքում տեղակայվելիք ՌՏԿ-ից ստացված տվյալները»։
Հիշեցնենք, որ թուրքական տարածքում ՆԱՏՕ-ի ՌՏԿ-ի տեղակայման մասին հուշագիրը Թուրքիան և ԱՄՆ-ն ստորագրել են սեպտեմբերի 14-ին Անկարայում։ Թուրքիայի կողմից հուշագիրը ստորագրել է արտգործնախարարության խորհրդական Ֆերիդուն Սինիրլիօղլուն, իսկ ԱՄՆ-ի կողմից՝ դեսպան Ֆրենսիս Ռիկիարդոնեն։
Ի դեպ, Թուրքիայի տարածքում ՌՏԿ-ի տեղակայման մասին որոշումն ընդունվել է անցած տարվա նոյեմբերի 19-20-ը տեղի ունեցած Լիսաբոնի գագաթնաժողովում։ Գագաթնաժողովից առաջ Թուրքիան առաջ էր քաշել 3 նախապայման, որոնց ընդունումից հետո միայն համաձայնեց իր տարածքում ՆԱՏՕ-ի ՌՏԿ-ի տեղակայմանը.
ա) եթե անգամ ՀՀՊ համակարգն Իրանի դեմ ուղղված նախագիծ է, ապա Լիսաբոնյան որոշման մեջ չպետք է գրավոր նշվի այդ մասին, բ) նախագիծը պետք է ծառայի միայն ՆԱՏՕ-ի անդամ երկրներին. թուրքական տարածքում տեղակայվելիք ՌՏԿ-ից ստացվելիք տեղեկությունները չպետք է հաղորդվեն Իսրայելին` որպես ՆԱՏՕ-ի անդամ չհանդիսացող երկրի, գ) նախագիծը պետք է պաշտպանի ՆԱՏՕ-ի անդամ բոլոր երկրներին, ներառյալ Թուրքիան:
