Ամռանը չորրորդ անգամ Իսպանիա է հասել անոմալ շոգը, և դրա գագաթնակետը սպասվում է առաջիկա օրերին: Այս մասին հայտնում է «Ինտերֆաքս»-ը՝ վկայակոչելով «Էֆե» գործակալությունը:
Ըստ կանխատեսումների՝ օգոստոսի 21-ին և 22-ին ջերմաստիճանը երկրի տարբեր մասերում կհասնի 39-ից 43 աստիճանի: Այսպիսով, Բալեարյան կղզիների շրջանում, ինչպես նաև Իսպանիայի հարավ-արևմուտքում և հյուսիս-արևելքում սպասվում է մոտ 40 աստիճան: Անդալուզիայի հարավ-արևմուտքում ջերմաչափերը կբարձրանան մինչև 43 աստիճան: Երկրի կենտրոնական մասում, ինչպես նաև Գալիցիայի հարավային մասում և Մալյորկայում՝ մոտ 39 աստիճան: Կատալոնական Լեռիդայում և Ժիրոնայում, ինչպես նաև Բարսելոնայում բնակիչներին կոչ են արել պատրաստվել ոչ միայն 40 աստիճան շոգի, այլև փոթորկի և հորդառատ անձրևների:
Երկրի մեծ մասում անոմալ բարձր ջերմաստիճանի պատճառով անտառային հրդեհների առաջացման վտանգը գնահատվում է բարձր:
Այս շոգ շրջանը, ինչպես սպասվում է, կտևի մինչև օգոստոսի 24-ը, իսկ հետո շոգը կնվազի:
Շոգ եղանակի պատճառով երկրում մոլեգնում են անտառային հրդեհները: Այս տարի Իսպանիայում բնական հրդեհներն արդեն ոչնչացրել են գրեթե 64 հազար հեկտար տարածք:
