ԵԱՀԿ Մինսկի խումբը չի դադարել և, եթե ապագայում լինի կառուցողական աշխատանքի հնարավորություն, ապա ԱՄՆ-ն դեմ չէ դրան, հայտարարել է Հայաստանում ԱՄՆ դեսպան Քրիստինա Քվինը՝ Հանրային հեռուստաընկերության հետ զրույցում: Սա հատկանշական հայտարարություն է, ինչի մասին խոսել եմ բազմիցս: Թեև Մինսկի խումբն ու եռանախագահությունը չեն աշխատում, այդուհանդերձ մանդատը՝ բացառիկ մանդատը, որ ԵԱՀԿ որոշումով օժտված է համանախագահությունը, չեղարկված չէ, թերևս այն պարզ պատճառով, որ լուծված չէ այն հարցը, որով զբաղվելու համար ստեղծվել էր այդ մանդատը: Խոսքը բնականաբար Լեռնային Ղարաբաղի հակամարտության մասին է, որը մշտապես էլ իր խորության և ամբողջության մեջ եղել է հայ-ադրբեջանական հակամարտություն:
Ավելին, հարցերը, որոնք գործնականում «սեղանին» են այսօր, տարբեր շեշտադրումներով ու տոնայնությամբ, տարբեր հնչեղությամբ, բայց սեղանին եղել են գործնականում միշտ, պարզապես ունեցել են այլ դրսևորումներ ու «դասավորություն», որովհետև այլ էր թե միջազգային ստատուս-քվոն, թե ստատուս-քվոն ռեգիոնում: Մեծ հաշվով, այսօր տեղի ունեցողը այդ իմաստով «շարունակություն» է, պարզապես արդեն միջազգային նոր ստատուս-քվոյի և այն կազմող ուժային կենտրոնների միջև նոր հարաբերության՝ պատերազմի պայմաններում, ինչը իր հերթին կատակլիզմների է բերում տարբեր առանձին ռեգիոններում: Այդ ամենով հանդերձ, փաստացի, Ադրբեջանից բացի, որևէ մեկը կասկածի տակ չի դնում համանախագահության մանդատը, որքան էլ այն տնօրինած սուբյեկտները ներկայումս գտնվում են միմյանց դեմ կոշտ դիմակայության, հիբրիդային պատերազմի ռեժիմում: Միացյալ Նահանգները հայտարարում է, որ դեմ չէ՝ եթե ապագայում լինի համանախագահության մանդատի շուրջ կառուցողական աշխատանքի հնարավորություն:
2022 թվականի ապրիլի 19-ին Հայաստանի վարչապետի և ՌԴ նախագահի համատեղ հայտարարության մեջ արձանագրվում է Մինսկի խմբի համանախագահության հանգամանքը, դրա գործունեության կարևորությունը: Սրանք անշուշտ շատ բարդ հարցեր են և հայտարարություններով չէ, որ լուծվելու են, և այդ հայտարարություններն էլ անշուշտ բացարձակապես «հալած յուղ չեն, սակայն այդ հայտարարությունները կարևոր ելակետեր են, որոնք թե Հայաստանի, թե Արցախի համար պահպանում են դիվանագիտական աշխատանքի կարևոր հնարավորություններ, այդ թվում Մինսկի խմբի համանախագահության մանդատի և դրա հետագծի ուղղությամբ: Բայց, այդ աշխատանքի փոխարեն, այդ հետագիծը Հայաստանում շարունակում է լինել ներքաղաքական «մանրախնդրության» ենթակա:
