Աշոտ Փաշինյանի հետ տեղի ունեցած միջադեպը և դրա առնչությամբ մեղադրանքը, որ ներկայացվել է 44-օրյա պատերազմին զոհված զինծառայողի մայր Գայանե Հակոբյանին, ակնհայտորեն փորձ է արվում դարձնել ներքաղաքական ձնագնդի: Այդ փորձը գուցե և օրինաչափ է, քաղաքական շահառություն ունեցող ուժերը մշտապես և ամենուր փորձում են այդ նպատակի համար օգտագործել հանրային հնչեղության ցանկացած միջադեպ, և Աշոտ Փաշինյանի հետ տեղի ունեցածը չէր լինելու բացառություն: Հատկապես, որ այն իսկապես բավականին աղմկոտ, և գոնե առայժմ շատ հարցեր պարունակող եւ գործնականում առայժմ առանց էական պատասխանների պատմություն է: Խնդրի զգայական կողմին անդրադարձել եմ օրեր առաջ, նկատելով, որ հարցն այդ առումով ունի շատ մեծ խորություն և ընկած է մեր հասարակական և պետական օրգանիզմի համակարգային խնդիրների հիմքում:
Դառնալով քաղաքական շահառությանը, որ անկասկած ծավալվում է խնդրի իրավական ծավալմանը զուգահեռ, ապա այստեղ պատկերը թերևս բավականին բազմաշերտ է, ոչ միարժեք, և իհարկե որոշակիորեն կապակցված է նաև իրավական գործընթացի տրամաբանությանը, մասնավորապես Գայանե Հակոբյանի կալանավորման մասին որոշմանը: Նախ, արդյո՞ք տեղի ունեցածը ունեցել է իրապես այնպիսի բնույթ, որը ենթադրում էր խափանման միջոցի ընտրության կալանքի տարբերակը: Առերեւույթ, իսկապես բավականին ծանր կարող է դիտվել վարչապետի ընտանիքի անդամի հանդեպ որևէ սպառնալիք քայլը: Մյուս կողմից, արդյո՞ք իսկապես եղել է այդօրինակ իրական սպառնալիք, և առավել ևս՝ որոշակիորեն կանխամտածված և ծրագրված:
Եթե ոչ, ապա կարո՞ղ էր արդարացված լինել կալանավորման որոշումը, որը իհարկե անխուսափելիորեն բորբոքելու էր կրքեր, թեժացնելու և ուժգնացնելու էր պատմության այսպես ասած քաղաքական հնչեղությունը: Կրկնեմ, այստեղ հարցադրումը պայմանավորված է նրանով, որ այդուհանդերձ խափանման միջոցի ընտրությունը կարծես թե միարժեք հիմնավորված չէ, կամ միարժեք հիմնավորված չէ տեղի ունեցածի կանխամտածված բնույթը: Թե՞ հիմնավորված է, պարզապես առայժմ ինչ-ինչ իրավական կամ գուցե քաղաքական նկատառումներով չբարձրաձայնված, և այդպիսով՝ պատահարի իրավական ծավալման վրա ծավալվում է նաեւ երկկողմանի կամ բազմակողմանի քաղաքական ինչ որ հաշվարկ, եւ առայժմ երկուստեք բխում է կրակը թեժացնելու տրամաբանությունը:
Այդ հարցն էլ իհարկե առայժմ չունի միարժեք պատասխան: Հնարավոր , որ այդ առնչությամբ կռահումների տեղիք տա վարչապետ Փաշինյանի՝ երկուշաբթի, մայիսի 22-ին նախատեսված ասուլիսը, որտեղ անշուշտ լինելու է երեք առանցքային թեմա՝ հայ-ադրբեջանական հակամարտության բանակցային իտենսիվ մաքոքի պտույտները, դրան զուգահեռ թմրանյութի խոշոր գործի բացահայտումը թե Իտալիայում, թե Հայաստանում, եւ դրանց զուգահեռ էլ Աշոտ Փաշինյանի հետ տեղի ունեցածը:
