Ռուսական Regnum լրատվական գործակալության փոխանցմամբ՝ Իսրայելը Թուրքիայից հետ է կանչել իր ռազմական կցորդին։ Վերջինս հայրենիք է վերադարձել խորհրդակցության նպատակով։
Սակայն թուրքական Hürriyet թերթը գրում է, որ իսրայելական իշխանությունները վճռել են չսպասել դեսպան Գաբի Լևիի վտարումից հետո ռազմական կցորդ, գնդապետ Մոշե Լևիի վտարմանը և դրանով իսկ կանխել Անկարայի կողմից իրենց նվաստացուցիչ փաստի առջև կանգնեցնելը։
Գազայում իսրայելական վարչակազմի նախկին ղեկավար Մոշե Լևին ընդամենը մեկ ամիս առաջ էր նշանակվել Թուրքիայում Իսրայելի ռազմական կցորդ։ Իսրայելի պաշտպանության նախարարության բարձրաստիճան ներկայացուցիչը Jerusalem Post-ին տված հարցազրույցի ժամանակ հայտարարել է, որ պաշտոնական Թել Ավիվը նախընտրում էր ռազմական կցորդին թողնել Թուրքիայում, սակայն հաշվի առնելով այն, որ թուրքական կառավարությունը ժամանակին չի պատասխանել իրենց հարցմանը՝ վճռել են ետ կանչել ռազմական կցորդին։
Թուրքիան նույնպես Իսրայելից հետ է կանչել իր ռազմական կցորդին, սակայն վերջինիս տեղակալը շարունակում է մնալ Իսրայելում։
Հիշեցնենք, որ ավելի վաղ Իսրայելի պաշտպանության նախարարության ներկայացուցիչ Ամոս Գիլադը հայտարարել էր, թե Իսրայելի ռազմական կցորդը մնալու է Թուրքիայում։
