Արդարադատության նախարարությունը օրենսդրական նոր փոփոխություն է ներկայացրել, որով առաջարկում է աճուրդով վաճառել կամ բարեգործական նպատակով նվիրաբերել պաշտոնյաների՝ գործուղումների ժամանակ ստացած, նաև արարողակարգային համարվող թույլատրելի արժեքից բարձր նվերները: Կլինի խմիչք, գիրք, կտավ, թե այլ նվեր` այն դառնում է պետության կամ համայնքի սեփականությունը, եթե թանկ է 60 հազար դրամից։
Իրավապաշտպանները, սակայն, կարծում են, որ սա լինելու է ձևական բնույթի հերթական օրենքներից մեկը։
Իրավապաշտպան Նինա Կարապետյանցը «Առաջին լրատվական»-ի հետ զրույցում նշեց, որ սա կլինի ձևական, քանի որ պաշտոնյաների զգալի մասը ուղղակի չեն էլ ներկայացնելու իրենց ստացած նվերները։ «Միայն այն նվերները, որոնք կերևան եթերում ինչ-ինչ պատճառներով, շատ պատահական, ստիպված կլինեն ցույց տալ, մյուսները գեղեցիկ ձևով ցույց չեն տա։ Ինչքանով կաշխատի սա, շատ մեծ հարց է։
Նախկինում աճուրդով վաճառվող ընթացակարգը չկար, բայց պարտավոր էին հանձնել։ Տարբեր բարձրաստիճան պաշտոնյաներ անգամ տուն են նվեր ստացել, ավտոմեքենաներ, իրեն զավակները, զոքանչները, սիրուհիները և կանայք են ստացել այդ ամենը և որևէ կերպ պետության կամ համայնքի բյուջե դա չի մտել։ Սա հերթական պոպուլիստական քայլն եմ համարում՝ ցույց տալու, որ մի այլ կարգի թափանցիկ և առաջադիմական են»,-ասաց Կարապետյանցը:
Ըստ նրա, իշխանությունը նշում է, որ նախագծի շրջանակում նվիրաբերության տարբերակն են ընտրել, որպեսզի համապատասխան բարեգործական կազմակերպությունները կամ բարեգործություն իրականացնող այլ անձինք ստացված նվերը կարողանան տնօրինել միայն իրենց բարեգործական ծրագրերի իրականացման նպատակով, այսինքն` չունենանք այնպիսի իրավիճակ, որ ստանան այդ նվերն ու, օրինակ, այդ կազմակերպության ղեկավարը պահի իր մոտ:
Կարապետյանցի խոսքով՝ իրականում հերթական անգամ իրավիճակային լուծում է առաջարկվում ավելի լայն իմաստով. «Ինչո՞ւ պետք է առհասարակ նվեր ստանան, ավելի լավ է մտածեն՝ արդյոք բոլոր նվերներն են հրապարակվելու, և արդյոք պետությունը տեղեկացված լինելու է բոլոր նվերների մասին, ես չեմ կարծում։
Նշվում է, որ 60 հազար դրամի նվերը կարող են չարձանագրել, դրանից թանկ նվերն է արժեքավոր համարվում: Հիմա նախիններից որ մեկին կանչում են հարցաքննության, պարզվում է՝ տարբեր առիթներով նվեր են ստացել։ Ես այլ հարց կտայի՝ ինչպես է ստացվել, որ մեր տարբեր պաշտոնյաներ տարբեր ժամանակաշրջաններում ստացել են ճոխ և թանկ նվերներ, իրենց ընտանիքի անդամները ձեռք են բերել մեծ ունեցվածք, և ունեցել են տարբեր կառույցներ: Իրենք պարտավոր էին այդ հարցերին անդրադառնալ, բայց տարիներ շարունակ չեն անդրադարձել։ Բա այս հարցը, ի վերջո, որևէ մեկը տալու է, բացի ինձնից։
Սա հարցերի հարցն է, վերահսկող մարմինները պետք է հստակ իմանան, որ ինչ-ինչ պատճառով չվերահսկելու հետևանքը լինելու է շատ ծանր և անձնական պատասխանատվության ներքո է գտվելու և ոչ թե ձևական հերթական որևէ օրենք բերեն և մի կողմ քաշվեն»,-իր խոսքն ամփոփեց իրվապաշտպանը:
