Բանակային սպանությունների մասին խոսելը դիվերսիա չէ բանակի նկատմամբ: Այսօր «Առաջին լրատվականի» հետ զրույցում հայտարարեց «Երկիր» օրաթերթի խմբագիր Բագրատ Եսայանը` խոսելով խաղաղ պայմաններում սպանված զինծառայողների և այս խնդրում ԶԼՄ-ների դերի մասին:
«Ցանկացած բացասական երևույթի մասին պետք է խոսել, ես չեմ կարծում, որ դա ինչ-որ կերպ կազդի բանակի հեղինակության վրա: Ընդհակառակը, հասարակությունը պետք է բանակային կառույցին մեծագույն սրտացավությամբ վերաբերվի, բայց նաև չպետք է աչք փակի բացասական երևույթների առջև, որ գոյություն ունեն բանակում:
Ուշադրությունը շատ ավելի առողջ կդարձնի կառույցը, քան եթե փորձենք ամեն ինչը փակել, չհրապարակել: Հայտնի է, որ բաց վերքը ավելի արագ է բուժվում, քան ինչ-որ ձևով փակված, գեղեցիկ տեսք տված վերքը: Այս դեպքում բուժման հույսերը շատ ավելի քիչ են լինում»,-մեկնաբանեց Բ. Եսայանը` հույս հայտնելով, որ վերքը բացելու դեպքում աստիճանաբար կբուժվի, իսկ վերք, նրա համոզմամբ, միանշանակ կա:
«Երկիր» օրաթերթի խմբագրի կարծիքով` բանակային դեպքերի հրապարակումը կարող է վատ լինել: «Բնականաբար, շատ ավելի լավ կլիներ, եթե այսպիսի դեպքեր չլինեին: Ցանկացած հասարակության մեջ գոյություն ունի հանցագործություն, հանցագործություն գոյություն ունի նաև մեծ հասարակության մեջ: Շատ բացասական երևույթներ կան մեր հասարակության մեջ, որոնց մի մասը շատ ավելի խտացված է բանակում, որտեղ միմիայն տղամարդիկ են: Բանակում շատ ավելի կոպիտ ու կոշտ բարքեր են տիրում: Բնականաբար, բանակը ևս չի կարող զերծ լինել այն երևույթներից, որոնք բնորոշ են մեր հասարակությանը»,- նշեց Բ. Եսայանը` ընդգծելով, որ այս երևույթների վերացմամբ պետք է զբաղվի իշխանությունը:
Խոսելով քաղաքական ուժերի դերի մասին այս գործում` ասաց, որ հասարակության մեջ առկա հոռի երևույթների վերացման ուղղությամբ պետք է աշխատի իշխանությունը, բայց իշխանությունն էլ չի պատժում մեղավորին: «Այս երևույթները դարձել են անպատժելի, և ավելին՝ ես այստեղ պետք է շեշտեմ հեռուստատեսությունների դերը, որտեղ էկրանի հերոսը «լավ տղեն ա», որին այսօրվա երիտասարդությունը փորձում է ընդօրինակել, ձգտում է դառնալ այնպիսին, ինչպիսին հեռուստաէկրանի հերոսն է»,- ցավով փաստեց Բ. Եսայանը` ընդգծելով, որ ամենալուրջ խնդիրը սա է:
Հարցին, թե իշխանությունն ի՞նչ է ձեռնարկում այս ուղղությամբ՝ օրաթերթի խմբագիրը պատասխանեց՝ ոչինչ: «Իշխանությունը որևէ քայլ չի ձեռնարկում, իշխանությունը չի փորձում որևէ կերպ բարոյական արժեքների վերականգնման ուղղությամբ որևէ քայլ ձեռնարկել: Առաջին հերթին չի ձգտում, օրինակ, ցույց տալ, որ դա չէ ճիշտ ապրելակերպը հենց իշխանավորների օրինակով»,- ասաց Բ. Եսայանը:
Անդրադառնալով հեռուստատեսություններին` նշեց, որ ռեյտինգացավով են տառապում մեր հեռուստատեսությունները: «Ամենաանճաշակ, ամենաայլանդակ բարքերը բերվում են հեռուստաէկրան, և երբ այդ հերոսները ներկայացվում են որպես հայ մարդիկ, տպավորություն է ստեղծվում, թե մեզ բնորոշ են այդ երևույթները»,- եզրափակեց իր խոսքը Բ. Եսայանը:
