Հավաքական անվտանգության պայմանագրի կազմակերպության (ՀԱՊԿ) առաքելության առաջատար խումբը առաջարկներ է ներկայացրել հայ-ադրբեջանական սահմանին լարվածության թուլացման վերաբերյալ: Այս մասին հայտնում է կազմակերպության մամուլի ծառայությունը։
«Գեներալ-գնդապետ Անատոլի Սիդորովը ՀՀ պաշտպանության նախարար Սուրեն Պապիկյանին տեղեկացրել է Հայաստանի և Ադրբեջանի սահմանին առանձին շրջաններում իրավիճակի վերլուծության արդյունքների, համապատասխան միջոցառումների վերաբերյալ հիմնական եզրակացությունների և առաջարկությունների մասին»,- ասված է հաղորդագրության մեջ:
Կազմակերպությունում պարզաբանել են, որ տեղի է ունեցել կարծիքների անկեղծ, կառուցողական փոխանակում և առաջարկություններ են մշակվել սահմանին լարվածության թուլացման վերաբերյալ:
Հիշեցնենք՝ այսօր՝ սեպտեմբերի 19-ին, ՀՀ պաշտպանության նախարար Սուրեն Պապիկյանն ընդունել է Հայաստանում ՀԱՊԿ մոնիթորինգային առաքելության օպերատիվ խմբի ղեկավար, ՀԱՊԿ Միացյալ շտաբի պետ, գեներալ-գնդապետ Անատոլի Սիդորովին։
