Օրերս լրագրող Նարեկ Կիրակոսյանն իր ֆեյսբուքյան էջում գրառում էր կատարել, որում ասվում էր․ «Պատերազմից անցել է 1,5 տարի։ Խոսում են բարեփոխվող բանակի մասին։ Այսօր այցելել էի Սյունիքի դիրքերում մայիսի 28֊ին թշնամու դիպուկահարի կրակոցից զոհված Դավիթ Վարդանյանի ընտանիքին։ Ծնողները պատմեցին, թե ինչ սարսափելի պայմաններում են զինվորները վիրավոր տղային երկու ժամում հասցրել շտապօգնության մեքենայի մոտ։ Ոչ մի ենթակառուցվածք չի եղել։ Այս խնդիրների ֆոնին ի՞նչն է բարեփոխվում, ի՞նչ է արվել, ինչո՞ւ է զինվորը մինչև հիմա վրանում (այն դիրքում որտեղ Դավիթն էր, վրաններ են եղել)․․․»։
«Առաջին լրատվական»-ը զրուցել է Արթուր Սաքունցի հետ՝ հասկանալու արդյոք ԶՈՒ բարեփոխումները ի վերջո որևէ արդյունք կտան, թե ոչ, և ինչու մինչև հիմա արդյունքեր չենք տեսնում։ Սաքունցի խոսքով՝ Կառավարությունը պարտավորություն վերցրել է ԶՈՒ բարեփոխումներ անել, սակայն հստակ ինչ գործողություններ են կատարվում՝ հայտնի չէ, որովհետև իրենց հայտնի չէ ռազմական «դոկտորի», ԱԱԾ-ի նոր ռազմավարության և այլնի մանրամասները։ Ասում է՝ գրեթե ոչ մի տեղեկության չեն տիրապետում՝ ԶՈՒ բարեփոխումների մասով։ Հայտարարում են, որ աշխատանքներ տարվում են, սակայն ինչ ուղղությամբ, ինչ գործողություններով՝ հայտնի չէ։ ԶՈՒ բարեփոխումների իրենց առաջարկի մեջ էլ մտնում է կառավարության վերահսկողության մեխանիզմների ձևավորումը և Զինված ուժերի կառուցվածքը, այն, թե ինչպիսին կարող է լինել դա ՀՀ-ում՝ հաշվի առնելով տարածաշրջանային վիճակը։ Նախագծի հանդեպ ուշադրությունը մեծ է, հույս ունեն՝ արդյունք կտա։
