Թուրքիայի նախագահ Ռեջեփ Թայիփ Էրդողանը ՆԱՏՕ-ի մադրիդյան գագաթնաժողովին մեկնելուց առաջ հանդես է եկել մեկնաբանություններով:
Այս մասին, հայտնում է թուրքական «Անադոլու» լրատվական գործակալությունը:
Էրդողանը հայտարարել է, որ որպեսզի Ֆինլանդիան և Շվեդիան միանան ՆԱՏՕ-ին, պետք է հաշվի առնել Թուրքիայի անվտանգության մտահոգությունները և նշել, որ այլ ելք չի կարող լինել:
Էրդողանը հիշեցրել է, որ Թուրքիան ՆԱՏՕ-ի անդամ է արդեն 70 տարի և որ իրենք դաշինքի մեջ պատահական երկիր չեն։
Նա նշել է, որ Մադրիդում քառակողմ (Թուրքիա, Շվեդիա, Ֆինլանդիա, ՆԱՏՕ – խմբ.) հանդիպման արդյունքներով պարզ կդառնա, թե ինչպիսին է սկանդինավյան երկրների դիրքորոշումը։
«Մենք դատարկ խոսակցություններ չենք ակնկալում, այլ կոնկրետ արդյունքներ»,- ասել է նա:
Էրդողանը 2022 թվականի հունիսի 28-30-ը մասնակցելու է Մադրիդում կայանալիք ՆԱՏՕ-ի պետությունների և կառավարությունների ղեկավարների գագաթնաժողովին։
Գագաթնաժողովում ռազմավարական մակարդակով կարծիքներ կփոխանակվեն եվրատլանտյան անվտանգությանը սպառնացող վտանգների և մարտահրավերների առնչությամբ, կգնահատվեն Ռուսաստան-Ուկրաինա ռազմական գործողությունների արտացոլումները դաշինքի վրա, և այդ համատեքստում ՆԱՏՕ-ի զսպող և պաշտպանական կառուցվածքը կվերանայվի։
Մադրիդում օրակարգում է նաև նոր ռազմավարական հայեցակարգի հաստատումը, որը կուղղորդի դաշինքի հետագա աշխատանքը։
Էրդողանը հանդիպումներ կունենա նաև որոշ դաշնակից և գործընկեր երկրների ղեկավարների հետ։
