«ՀԺ»-ն, անդրադառնալով Համահայկական խաղերի 5-րդ անգամ Երևանում անցկացմանը, գրում է.
«Արդյոք խաղերի համար ստեղծվե՞լ էին պայմաններ, որ «հաճախ գան Հայաստան», էլ չենք խոսում մշտապես Հայաստան տեղափոխվելու մասին։ Նախ, զարմանալիորեն Երևանի քաղաքապետը հենց այդ (Համահայկական հինգերերոդ խաղերի) օրերին սկսեց Երևանի կենտրոնական հատվածի՝ Օպերայի շրջակայքի, Մաշտոցի պողոտայի և այլն, բարեկարգման աշխատանքները։ Քանդվեցին մայթերը, ինչի հետևանքով հիմնականում այդ հատվածում զբոսնող հյուրերը ստիպված էին քայլել հողի ու փոշու մեջ։ Մի՞ թե հնարավոր չէր մայթերը քանդել մինչ Համահայկական խաղերի մեկնարկը կամ էլ դրանից հետո։
Մարզակառույցներում, որտեղ տեղի էին ունենում մրցումները, բնականաբար, կազմակերպվել էր սննդի, զովացուցիչ ջրերի վաճառք, ու ինչպես տեղեկացանք՝ դա արվել էր խաղերի կազմակերպիչների միջոցով։ Բայց այստեղ արդեն իսկական թալան էր։ Դեռ բացման օրը «Հանրապետական» ստադիոնի մատույցներում 100 դրամ արժողությամբ հասարակ ջուրը վաճառվում էր 400 դրամով, իսկ հետագա օրերին այն հասավ աստղաբաշխական գնի՝ 1000 դրամ։
Հետ չէին մնում նաև տաքսիստները. ինչպես պատմեց հյուրերից մեկը, Մաշտոց պողոտայի շուկայից մինչև «Հրազդան» ստադիոն վարորդը պահանջել է 5000 դրամ, տեղեկացնելով, թե 1 կմ-ի արժեքը հենց այդքան է։ Հայաաստանի ոստիկանապետը առիթը բաց չի թողնում նշելու, թե ոստիկանի կերպարը վատ է ընկալվում մեր հասարակության կողմից։ Հայ ոստիկանների մասին կարծիք կազմեցին նաև խաղերի մասնակիցները։ Մրցումների ընթացքում իբր կարգ ու կանոն պահպանող ոստիկանները մեծ մասամբ զբաղված էին մարզուհիներին ռեպլիկներ անելով, ցինիկ պահվածքով ու թղթախաղով։ Ընդ որում, թղթախաղն այնքան մեծ մասսայականություն էր վայելում կարգ պահպանելու կոչված ոստիկանների մեջ, որ կարելի է հաջորդ Համահայկական խաղերի ծրագրում ընդգրկել նաև թղթախաղը»։
