Այսօր «Ժառանգության» ԱԺ պատգամավոր Ստյոպա Սաֆարյանից հետաքրքրվեցինք, թե որքա՞ն արդյունավետ կարող է լինել կրպակատերերի հարցի լսումը ԱԺ-ում՝ հաշվի առնելով այն, որ փողոցային առևտրի հարցի քննարկումը ԱԺ-ում ոչ մի բանի չհանգեցրեց:
Նա մեզ հետ զրույցում նշեց, որ բացօթյա առևտրի հարցը իր բնույթով, եթե անգամ մի փոքր մոտ լինի կրպակների հարցին, այնուամենայնիվ, դրանք տարբեր են, որովհետև բացօթյա առևտրականների հարցը ի սկզբանե օրենքի դաշտից դուրս է եղել: «Նրանք ոստիկանին գումար էին տալիս, փողոցում ինչ-որ մի տեղ կանգնում էին, և այդ առումով շատ դժվար է դա համեմատել կրպակների հետ: Այսինքն՝ իրավական հիմքերի հիմնավորվածության առումով՝ երկու խնդիրները բավականին տարբեր են:
Երկրորդ՝ բացօթյա առևտրի խնդիրը վերջնահաշվում հանգել էր 30-40 մարդու խնդրի, այս պարագայում մենք գործ ունենք , եթե չասեմ հարյուրավոր, ապա հազարավոր մարդկանց հետ:
Իսկ երրորդը՝ բացօթյա առևտրի ընդդիմախոսների փաստարկներն այդպիսն չէին, ինչպիսին այս կրպակների դեպքում: Կրպակների դեպքում մենք գործ ունենք բացարձակ ոչ օրինաչափ գործողությունների հետ, ինչը և ամրապնդեց ՄԻՊ-ը: Այս առումով՝ ես կարծում եմ, որ կրպակատերերի հաջողությունը կախված է ոչ թե նրանից, թե կրպակատերերի հարցը կքննարկվի այստեղ, թե այնտեղ, այլ որ կրպակատերերը հետևողական կլինեն իրենց իրավունքների պաշտպանության համար:
Չմոռանանք, որ կրպակատերերը մի փոքր այլ խավ են ներկայացնում՝ ապահովվածության առումով , քան բացօթյա առևտրով զբաղվող մարդիկ էին: Վերջին հաշվով ԱԺ նախագահն ինքը խոսք է տվել օրինագիծը ներառել օրակարգում»,- պարզաբանեց Ստյոպա Սաֆարյանը:
