Եվրամիության հատուկ ներկայացուցիչ Տոյվո Կլաարը թվիթերյան գրառում է արել Հայաստան եւ Ադրբեջան այցելելու մասին, նշելով, որ անհամբեր սպասում է առաջիկա օրերին այդ այցին: Տոյվո Կլաարը հավանաբար գալիս է դեկտեմբերի 14-ին Բրյուսելում ԵԽ նախագահ Շարլ Միշելի միջնորդությամբ տեղի ունեցածծ Փաշինյան-Ալիեւ հանդիպման օրակարգով: Համենայնդեպս ենթադրվում է, որ ԵՄ հատուկ ներկայացուցչի այցը պետք է լինի այդ տրամաբանության շրջանակում: Մինչ այդ սակայն, Վատիկանում Ադրբեջանի դեսպանը հայտարարել է, որ Բաքուն դիմել է Սուրբ Աթոռին՝ Հայաստանի եւ Ադրբեջանի հարաբերության կարգավորման միջնորդության համար: Չներկայացնելով մանրամասներ, Բաքվի դեսպանը հայտարարել է, որ Հռոմի Պապը «հետաքրքրված» է այդ հարցով: Ըստ նրա, Վատիկանը կարող է լինել միջնորդ, որովհետեւ լավ հարաբերություն ունի թե Հայաստանի, թե Ադրբեջանի հետ: Բաքուն Վատիկանում դեսպանատուն բացելու մասին հայտարարեց 44-օրյա պատերազմից հետո: Ասել, թե մինչ այդ Ադրբեջանը չէր հետաքրքրված եւ չէր աշխատում Սուրբ Աթոռի ուղղությամբ, կլինի սխալ: Ավելին, Ալիեւները այցելել են Սուրբ Աթոռ, հանդիպել Հռոմի Պապին, անգամ արժանացել պարգեւի: Սակայն Վատիկանում դեսպանության բացման մասին «հետպատերազմյան» որոշումը վկայեց, որ Ադրբեջանը մտադիր է առավել ինտենսիվ օգտագործել վատիկանյան հարթակը: Բաքվի համար այստեղ թերեւս առաջնային նշանակություն է ունենալու իր վերահսկողության տակ անցած հայկական տարածքներում քրիստոնեական ժառանգության հանդեպ վերաբերմունքի խննդիրը:
Ադրբեջանը թերեւս ակնկալում է Վատիկանի օգնությամբ հասնել իր գործողությունների շուրջ որոշակի լոյալ միջավայրի կամ մթնոլորտի ձեւավորմանը: Չի բացառվում, որ բացելով աշխատանքի նոր, եւ թերեւս կարեւորագույն մի ուղղություն, Ադրբեջանը փորձում է մեծացնել Հայաստանին թելադրվող դիվանագիտական-քաղաքական պայքարի ճակատը, փորձելով այդ դաշտում իրացնել իր ռեսուրսային առավելությունը: Հատկանշական է, որ հունվարի 20-ին Հայաստանի կառավարությունը կայացրել է դեսպանատների ֆինանսական հատկացումները ավելացնելու որոշում, իսկ վարչապետ Փաշինյանը նշել է, որ անկարեւոր թվացող այդ հարցն իրականում էական նշանակություն ունի դիվանագիտական աշխատանքի արդյունավետության համար: Դա անհերքելի է: Փաշինյանը նշել է, որ նախկինում Հայաստանի որևէ դեսպանատներ ֆինանսավորվել են անգամ անհատների մակարդակով: Այդ շարքում եղել է Վատիկանում Հայաստանի դեսպանատունը, թե ոչ, պարզ չէ, սակայն անկասկած է, որ Սուրբ Աթոռում Հայաստանի դիվանագիտական աշխատանքը նոր իրավիճակում ստանում է առավել մեծ կարեւորություն, քանի որ Ադրբեջանը թելադրում է այդ ուղղությամբ առավել իտենսիվ մրցակցություն:
