Տեղեկատվական և բարձր տեխնոլոգիաների համաշխարհային կենտրոններից մեկում՝ ԱՄՆ Սիլիկոնային հովտում Հայաստանի ներկայացուցչության բացման մասին խոսվում է արդեն 3 տարի: Հայկական ներկայացուցչությունը նախատեսվում էր բացել դեռ անցած տարի, սակայն, պաշտոնյաների հավաստմամբ, դրան խոչընդոտել են որոշ տեխնիկական խնդիրներ:
«Ձեռնարկությունների ինկուբատոր» հիմնադրամի տնօրեն Բագրատ Ենգիբարյանը «Առաջին լրատվական»-ին տեղեկացրեց, որ այս տարի սեպտեմբերին Համաշխարհային բանկի (ՀԲ) առաքելությունը պետք է գա Հայաստան՝ կառավարության հետ քննարկելու պետական-մասնավոր համագործակցության մոդելի կոնցեպցիան:
«Ամբողջ ծախսը չի կարող պետությունը փակել: Ըստ հաջողության տոկոսների և այլնի պետք է համաֆինանսավորում լինի: ՀԲ-ն ու կառավարությունը կքննարկեն ու կորոշեն՝ բացել, թե՝ ոչ»,- ասաց Բ. Ենգիբարյանը:
Հարցին, թե ինչո՞ւ է այսքան ուշանում ներկայացուցչության բացումը, Բ.
Ենգիբարյանը պատասխանեց, որ, ըստ վարկային համաձայնագրի, մինչև չհաստատվի գործնական ձեռնարկը՝ մոդելը, ծրագիրը չի կարող սկսվել, իսկ դա ՀԲ-ից է կախված:
Բ. Ենգիբարյանը նշեց, որ 4 տարվա համար 1 մլն դոլար է հարկավոր, որի մի մասը կառավարությունը պետք է ապահովի, մյուսը՝ մասնավորը. «Հետաքրքիրն այն է, որ եթե բիզնեսը հաջողություն ունենա, ի՞նչ տոկոսադրույք և ինչքա՞ն է մասնավորը վճարելու: Պետությունը կատալիզատորի դեր պետք է կատարի, բայց նաև պետք է վստահ լինի, որ եթե 4 տարի հետո դուրս է գալու, գրասենյակը չի փակվի»:
Բ. Ենգիբարյանն ասաց, որ եթե ամեն ինչ լավ լինի, հնարավոր է, մինչև տարեվերջ ներկայացուցչությունը բացվի, մինչ այդ էլ կհայտարարվի գրասենյակի կառավարչի մրցույթ:
Հիշեցնենք, որ, ինչպես նախատեսվում էր, ՀՀ ներկայացուցչությունը պետք է տեղակայվի Plug & Play համակարգչային ձեռնարկությունների ինկուբատորում, որի հետ համագործակցություն հաստատվել է 2009 թ. նոյեմբերին՝ ինկուբատորի տնօրենի՝ Հայաստան այցելության ընթացքում: Plug & Play-ում ներկայացուցչություն են հիմնել Չեխիան, Սլովակիան, Էստոնիան և անգամ ԱՄՆ-ի հարևան Կանադան:
