Արցախի հակամարտությունը կարգավորված չէ, որովհետև լուծված չէ Արցախի կարգավիճակի հարցը, Երևանում հայտարարել է Միացյալ Նահանգների դեսպան Լին Թրեյսին: Միաժամանակ նա մատնացույց է արել սահմանային լարվածությունը և նշել, որ Նահանգների նպատակն է հնարավորինս արագ հասնել ապաէսկալացման, որպեսզի հնարավոր լինի լուծել մնացյալ հարցերը: Ըստ դեսպանի, Նահանգները որպես Մինսկի խմբի համանախագահ երկիր աշխատելու է այդ ուղղությամբ: Փաստորեն ստացվում է, որ, արցախյան հակամարտությունը կարգավորված չէ, որովհետև որոշված չէ Արցախի կարգավիճակի հարցը, իսկ կարգավիճակի հարցի շուրջ քննարկումների համար էլ պետք է լինի լարվածության և սահմանային միջադեպերի չեզոքացում: Նշանակու՞մ է դա արդյոք, որ Վաշինգտոնը սահմանային լարվածության թուլացումով է պայմանավորում բանակցության վերսկսումը:
Բանն այն է, որ այդ դեպքում Ադրբեջանը երբեք չի գնա լարվածության թուլացման, առնվազն, քանի դեռ բանակցությունը չի վերսկսի իր օրակարգով: Այդ դեպքում, որպես Մինսկի խմբի համանախագահող երկիր, որի նպատակն է լարվածության թուլացման հասնելը, Նահանգներն ունի՞ այդ խնդիրը լուծելու վերաբերյալ իր պատկերացումը կամ առաջարկը: Ինչպես հայտնի է, Ադրբեջանի դիրքորոշումը այն է, որ լինի սահմանագծում ու սահմանազատում և տարածքային ամբողջության ճանաչում, ինչը կնշանակի բացառել կամ փակել կարգավիճակի հարցը՝ առնվազն Ադրբեջանի տարածքային ամբողջության շրջանակից դուրս: Այսինքն, այդ դեպքում կստացվի, որ Արցախը կարգավիճակ կարող է ունենալ միայն Ադրբեջանի միջազգայնորեն ճանաչված սահմաններում: Սա ըստ էության ասում է Բաքուն:
Երևանն ինչպես հայտնի է, ասում է, որ արցախյան հակամարտության կարգավորումը չի կարող կապակցվել սահմանագծման և սահմանազատման գործընթացի հետ: Այլ կերպ ասած, Երևանը նաև կարգավիճակի հարցի քննարկումը չի կապում սահմանային լարվածության նվազման հետ, ինչպես օրինակ կապակցվածություն է նկատվում ԱՄՆ դեսպանի խոսքում: Այստեղ է, որ պատկերն ավելի որոշակի դարձնելու համար հարկավոր է հասկանալ, թե Միացյալ Նահանգները որպես Մինսկի խմբի համանախագահող երկիր, ի՞նչ կոնկրետ պատկերացում-առաջարկ ունի սահմանային լարվածությունը չեզոքացնելու խնդիրը լուծելու համար: Կամ, բանակցության վերսկսման հարցի լուծումը պետք է չկապել սահմանային լարվածությունը չեզոքացնելու հետ:
