«Առաջին լրատվական»-ի հարցերին պատասխանել է Արցախի ԱԳ նախարար Դավիթ Բաբայանը
Պարոն Բաբայան, Ալիևը շաբաթ օրը բանակի ղեկավար կազմի հետ հանդիպմանը հայտարարել է, որ Հայաստանը պետք է ընդունի նոր իրականությունը և բանակցություններ սկսի Ադրբեջանի հետ՝ սահմանը որոշելու համար: Նա պնդել է, որ Հայաստանի հետ հաշտության պայմանագիր պետք է կնքել; Ինչպե՞ս եք գնահատում այս հայտարարությունները և ի՞նչ կարծիք ունեք հաշտության պայմանագիր կնքելու վերաբերյալ:
Հաշտության պայմանագիրը, եթե խոսում ենք ուղղակի որպես գաղափար, իհարկե, ո՞վ է դեմ, որ նման բան լինի: Ոչ ոք դեմ չէ, որ լինի հաշտության պայմանագիր, խնդիրն այն է, թե ինչ պայմաններով է այդ պայմանագիրը կնքվում, ինչ է լինելու, ոնց է լինելու կարգավորումը:
Բնական է, որ Ադրբեջանը հիմա չունի անկեղծ շահագրգռվածություն Հայաստանի և հայ ժողովրդի հետ բարեկամանալու և բարիդրացիական հարաբերություններ ստեղծելու: Եթե այդպիսի նպատակ ունենային, գերիների նկատմամբ նման վերաբերմունք չէին ցուցաբերի, բազմաթիվ պատանդներ ունենք, որոնց անուններն անգամ չգիտենք, կհրապարակեին անունները, չէին հարի այսպիսի հայատյաց, նացիստական քաղաքականություն: Հետևաբար, այդ հաշտության պայմանագիրն իրենք ուզում են, որպեսզի հայերն իրենց ձեռքով հրաժարվեն Արցախից և ճանաչեն Ադրբեջանի մաս: Դա են իրենք ուզում անել, և բնական է, որ դա չպետք է տեղի ունենա:
Տեսակետներ են հնչում, որ երբ Հայաստանում ձևավորվի նոր կառավարություն և Նիկոլ Փաշինյանը դառնա վարչապետ, առաջին այցը պետք է լինի Արցախ, որոն նա պետք է ցույց տա Լեռնային Ղարաբաղի նկատմամբ իր վերաբերմունքը: Դուք ինչպե՞ս եք գնահատում նման տեսակետը:
Եկեք սպասենք, տեսնենք, թե ինչպես է զարգանում իրավիճակը: Ես այս պահի դրությամբ չեմ կարող ասել: Սպասենք տեսնենք, այցը լինելու է, թե չի լինելու, ինչ ձևով է լինելու, որից հետո կխոսենք: Արցախը որպես կարևորագույն արժեք պետք է լինի պետականաշինության հիմքում, դա միանշանակ է և որևէ մեկը չի կարող ունենալ այլ կարծիք: Բայց դրա դրսևորումները տարբեր ձևով պետք է լինեն, այդ թվում նաև այցերի, հայտարարությունների, այդ թվում այն բոլոր մարդիկ, որոնք հակաղարաբաղյան ելույթներ կունենան, պետք է ենթարկվեն պատասխանատվության, այդ թվում քրեական: Բազմաթիվ հարցեր կան, կսպասենք, կտեսնենք:
Ալիևը նաև հայտարարում է, որ Լեռնային Ղարաբաղը որպես առանձին միավոր չպետք է դիտարկել, այն որպես առանձին միավոր գոյություն չունի: Այս հայտարարություններն ի՞նչ կարող են փոխել ներկա իրավիճակում:
Իսկ դուք ի՞նչ եք սպասում Ալիևից, որ ասի՝ Լեռնային Ղարաբաղը գոյություն ունի կամ անկախ պետությո՞ւն է: Իհարկե, Ալիևը պետք է այդպես ասի: Մենք պետք է չափազանց սառնասրտորեն վերաբերվենք այդ բոլոր հարցերի նկատմամբ, որովհետև դա այն է, ինչ սպասելի է Ադրբեջանից: Այդտեղ որևէ տարօրինակ բան չկա:
Արցախում ներքաղաքական լարված իրավիճակն արդեն հանդարտվե՞լ է:
Այո, հանդարտվել է, լարվածություն չկա, իրավիճակն ընդհանուր առմամբ, նորմալ է ու հանգիստ:
Դեմարկացիայի, դելիմիտացիայի գործընթացը որ սկսվի, Արցախի իշխանությունները և դուք որպես ԱԳ նախարար, ինչ նկատառումներ ունեք դրա հետ կապված:
Սա շատ կարևոր գործընթաց է, բայց նաև պատմական գործընթաց կարող է լինել, քանի որ կամ այսպես կարող է շրջել հայոց պատմությունը, կամ այնպես: Տեսնենք՝ ինչպես կզարգանան իրադարձությունները:
