Հարավային Կովկասում ԵՄ ներկայացուցիչ Փիթեր Սեմնեբին, ով Բաքվում է, դեկտեմբերի 1-2-ը Աստանայում կայանալիք ԵԱՀԿ գագաթնաժողովում ԼՂ-ի հակամարտության վերաբերյալ կանխատեսումներ անելիս նշել է. «Այժմ հնարավոր չէ խոսել գագաթնաժողովի արդյունավետության մասին ԼՂ խնդրի կարգավորման առնչությամբ, սակայն նկատվող ակտիվությունը նման հույսի հնարավորություն է տալիս»,- հայտնում է ադրեբեջանական Trend-ը:
«Կան հարցեր, որոնք ակտիվ քննարկվում են, և դա համենայնդեպս առիթ է ընձեռում հույս ունենալու, որ Աստանայի հանդիպումը ինչ-որ առաջընթացի կհանգեցնի»,- ասել է ԵՄ ներկայացուցիչը՝ հավելելով. «Ես չեմ ուզում մինչ Աստանայի հանդիպումը քննարկել բանակցային գործընթացի մանրամասները: Դա բանակցությունների նուրբ պահերից է»: Նրա խոսքով` փաստը, որ բանակցություններն ակտիվորեն ընթանում են, և որ ԵԱՀԿ Մինսկի խումբը գործում է, նշանակում է, որ «պրոցեսը դարձյալ ընթանում է»:
