Փաստաթուղթը, որը ներկայացվել է երեկ իբրև պարտություն, կյանքի կոչվելու դեպքում փակելու է շատ բերաններ. Ալեն Սիմոնյան

Ակնհայտ է, որ դրսից ազդեցություն կա այդ մարդկանց վրա, նրանք ուղղակի կամ անուղղակի համագործակցում են մեր թշնամու հետ: Այս մասին ֆեյսբուքյան իր էջում գրել է ԱԺ փոխխոսնակ Ալեն Սիմոնյանը։

«Կարճ՝ երեկվա մասին:

1) Ադրբեջանական ցանցը Հայաստանում՝ իր ուղղակի կամ անուղղակի գործակալների միջոցով, տարածում է հայ-ադրբեջանական ընդհարման տեսանյութից մի կտոր, որտեղ երեւում է, թե ոնց են ադրբեջանական զինվորները լկտի պահում իրենց մեր զինվորների նկատմամբ, բռնություն գործադրում: Կադրից դիտավորյալ դուրս է թողնվում մեր տղերքի «արձագանքը», որպեսզի մաքսիմալ շահարկման թեմա դառնա, որպեսզի հնարավորինս նսեմացված զգանք մեզ եւ, բնական է, մեղավոր փնտրենք:

2) ՀՀ ՊՆ-ն տեղեկատվական այս հարձակումների ֆոնին երեկ՝ մայիսի 19-ին, չգտնելով նման իրադարձության վերաբերյալ տեղեկություն, հերքում է, իսկ մեկուկես ժամ անց հաստատում է, որ տեսանյութի հատվածը ամսի 17-ին տեղի ունեցածի տեսագրության մի մասն է, որի մասին տեղեկությունն արդեն, իսկ եղել է լրատվական դաշտում:

3) Ես հրապարակում եմ ՊՆ-ի պարզաբանումը՝ հստակ նշելով, որ ըստ ՊՆ-ի՝ նման բան տեղի չի ունեցել, հետագայում վկայակոչելով նույն աղբյուրը՝ թարմացնում ինֆորմացիան՝ կրկին հղում տալով ՊՆ հայտարարությանը: Դրան հետեւում է հարձակում իմ էջի վրա, հայհոյանքներ լուսանկարներիս տակ եւ տեղեկատվություն, թե իբր ես ջնջել եմ էջս:

Բոլոր այն օգտատերերը, որոնք իրենց թույլ են տվել հայհոյանքներ, վիրավորանքներ, արգելափակվել են: Հավելեմ նաեւ, որ վերադարձնում եմ բոլոր ասածներն իրենց գերադրական աստիճանով:

4) Անճարությունից եւ խուճապի մատնված օգտագործելով ստեղծված լարվածությունը՝ մի փաստաթղթի լուսանկար է հրապարակվում, ուր փակված է տեքստի 95%-ը եւ ներկայացվում է այն իբրեւ նոր փաստաթուղթ, որով իշխանությունը պատրաստվում է ինչ-որ բան հանձնել, զիջել: Ակնհայտ է, որ նման բան լինելու դեպքում փաստաթուղթը կհրապարակվեր ամբողջությամբ, իսկ այս դեպքում արվում է ամեն բան խուճապ տարածելու համար:

5) Երեկ եւ դրանից առաջ գործի են դրվում տարբեր կլոունների գործողություններ, որոնք պետք է ապահովեն մարդկանց տերրորի ենթարկելու գործը: Համացանցում մեկնաբանություններ, տեսանյութեր գրելով՝ գիշերը փողոց հրավիրելով եւ հրահրելով:

Անկեղծ, զարմանում եմ, թե ինչպես կարելի է նմաններին լսել եւ թեկուզ 10 -20 հոգով գիշերը գնալ ինչ-որ առեւտրի կենտրոնի մոտ հավաքագվել կամ գնալ կառավարության շենքի մոտ:

Եվ այսպես, ի մի բերելով այն, ինչ տեղի է ունենում.

այս ամենն արվում է մի քանի պատճառով: Ակնհայտ է, որ դրսից ազդեցություն կա այդ մարդկանց վրա, նրանք ուղղակի կամ անուղղակի համագործակցում են մեր թշնամու հետ: Նպատակը՝ ներսում թուլացնել ՀՀ իշխանությանը, որպեսզի հաջողության հասնել դուրսը բանակցությունների ժամանակ:

Ակնհայտ է, որ զարգացումները, ի հեճուկս այն բանի, որ մենք պատերազմ ենք պարտվել 6 ամիս առաջ, ՀՀ-ի կողմից տարվում են ճիշտ եւ ավելի ամուր դիրքերից, քան սպասելի էր, բոլորի համար, եւ պետք է դա թույլ չտալ:

Ակնհայտ է, որ ընդամենը 30 օր հետո կայանալիք ընտրություններին իշխող ուժը բաձարձակ առաջատար է, դա թույլ տալ չի կարելի ոչ մի գնով:

Ակնհայտ է, որ նպատակ կա վարկաբեկել ՀՀ իշխանության խոսքը, որպեսզի հնարավոր լինի սեփական օրակարգը թելադրել, եւ ՊՆ-ի երեկվա բացթողումը լավ առիթ էր:

Եվ, վերջում, այն փաստաթուղթը, որը ներկայացվել է երեկ իբրեւ պարտություն, իսկ իրականում շատ կարեւոր եւ հայկական կողմին ձեռնատու, կյանքի կոչվելու դեպքում փակելու է շատ բերաններ եւ խուճապ է առաջացրել «ադրբեջանամերձ ընդդիմադիր» հատվածում:

Ի՞նչ անել :

Լցվել համբերությամբ, ուժով եւ պատրաստակամությամբ՝ լուծելու այս հարցը:

Թույլ չտալով, որ մեզ մանիպուլացնեն, խաղան մեր զգացմունքների եւ արժանապատվության հետ՝ ուղղորդելով այն իրենց ուզած ուղղությամբ եւ ամսի 20-ին ավարտի հասցնել այն ինքնամաքրման պրոցեսը, որը սկսել ենք 2018 թվականի հեղափոխության օրը:

2021 թվականի հունիսի 20-ին ընտրություններին ամենայն հավանականությամբ մասակցելու են ՀՀ նորագույն պատմության բոլոր 4 ղեկավարները, ժողովուրդը պետք է իր դատավճիռը կարդա այդ օրը:

Դուխներդ տեղը, գլուխներդ բարձր»,- գրել է նա։