Грузия Online-ի փոխանցմամբ՝ Վրաստանի փոխարտգործնախարար Սերգի Կապանաձեն Civil Georgia-ին տված հարցազրույցի ժամանակ հայտարարել է, որ Վրաստանը մտադիր է Ռուսաստանի հետ խաղալ քաղաքակիրթ կանոններով.
«Ցանկանում եմ ընդգծել, որ Առևտրի համաշխարհային կազմակերպության (ԱՀԿ) վերաբերյալ յուրաքանչյուր համաձայնագիր, որը կկնքվի Վրաստանի ու Ռուսաստանի միջև, կունենա չեզոք կարգավիճակ և կողմնորոշված կլինի միայն դեպի առևտուր և որևէ առնչություն չի ունենա քաղաքականության հետ։
Դրա համար էլ Մեդվեդևի և այլ ռուս բարձրաստիճան պաշտոնյաների կողմից հնչող այն մեղադրանքները, թե Վրաստանը քաղաքականացնում է հարցը, զուրկ է ամեն տիպի հիմնավորումներից և նպատակ է հետապնդում հասարակությանը մոլորության մեջ գցել։ Նրանց կողմից հնչեցված նմանատիպ հայտարարությունները միտված են դրան։
Մինչդեռ վրացական կողմը բարի կամք է դրսևորում՝ Մոսկվայի հետ ԱՀԿ-ին Ռուսաստանի անդամակցության հարցով բանակցություններ վարելու վերաբերյալ իր համաձայնությունը տալով։ Վրացական իշխանություններն արդեն իսկ բարի կամք դրսևորեցին, երբ այդ հարցով բանակցություններ սկսեցին։ Ընդ որում, դա տեղի ունեցավ միայն Ռուսաստանի կողմից պաշտոնական խնդրանքից հետո։
Դա մեր բարի կամքի դրսևորման լուրջ արտահայտությունն էր, ինչն ի ցույց է դնում, որ Վրաստանը մտադիր է Ռուսաստանի հետ խաղալ քաղաքակիրթ կանոններով»։
