Մեծ Բրիտանիայում սպանել են 83-ամյա միլիոնատեր սըր Ռիչարդ Սաթոնին, որը երկրի ամենահարուստ մարդկանցից մեկն էր: Այդ մասին հաղորդում է Sky News-ը:
Ապրիլի 7-ին անհայտ անձը սուր առարկայով հարձակվել է Սաթոնի վրա՝ Դորսեթ կոմսությունում գտնվող նրա տանը: Հարձակվողը վիրավորել է նաև Սաթոնի 60-ամյա կնոջը: Նրան ծայրահեղ ծանր վիճակում տեղափոխել են Բրիստոլի հիվանդանոց:
Ոստիկանությունը հայտնել է, որ Լոնդոնում Սաթոնի սպանության կասկածանքով ձերբակալել են 34-ամյա մի տղամարդու: Դորսեթ կոմսության իրավապահ մարմիններն իրենց հերթին նշել են, որ մարդասպանն ու զոհը միմյանց ճանաչել են:
Ըստ The Sunday Times-ի, Սաթոնը Մեծ Բրիտանիայի ամենահարուստ մարդկանց ցուցակում զբաղեցնում էր 435-րդ հորիզոնականը՝ 301 միլիոն ֆունտ ստեռլինգ կարողությամբ: Նա Լոնդոնում գտնվող Sheraton Grand և Athenaeum hotels 5-աստղանի հյուրանոցների սեփականատերն էր:
