Իտալահայ քանդակագործ Սևակ Գրիգորյանն այսօր լրագրողների հետ հանդիպմանը, խոսելով «Մոնոտիպեր» ցուցահանդեսի մասին, նշեց, որ այն մի յուրահատուկ ոճ է ներկայացնելու հասարակությանը: Ցուցահանդեսը ներկայացվելու է «Բյուրոկրատ» գրախանութում:
Սևակ Գրիգորյանի խոսքով՝ ներկայացվելու են մի օրինակից տպվող աշխատանքներ, որոնք իրենց հերթին մի տեսակ գրառումներ են ավելի մեծ աշխատանքի համար. «Չնայած յուրաքանչյուր աշխատանք ավարտուն է, բայց կան թեմաներ, որոնք զարգացման հեռանկարներ ունեն»: Քանդակագործը նաև նշեց, որ ցուցահանդեսին նաև ներկայացված են հետևյալ շարքերը. «Երեխաներ շարքը, որտեղ երեխաներն անցնում են Եղեռնի ճանապարհով և բացահայտում Եղեռնի թեման, կենդանիների շարքը, որը մեծ դինամիկա ունի, և սրբերի շարքը»:
Ցուցահանդեսը տևելու է օգոստոսի 8-ից 30-ը: Սա Սևակ Գրիգորյանի առաջին ցուցահանդեսն է Հայաստանում, իսկ մինչ այդ քանդակագործը երկու այլ թեմաներով ցուցահանդեսներ ունեցել է Հռոմում:
«Բյուրոկրատ» գրախանութի տնօրեն Արմինե Շահբազյանը, խոսելով ցուցահանդեսի մասին, նշեց, որ իրենց նպատակն է ցուցադրել երիտասարդ արվեստագետներին և հատկապես հնարավորություն տալ նրանց, ովքեր դժվարություններ են ունենում ցուցադրման հարցում: Գրախանութը 8 ամիս աշխատում է այս ուղղությամբ:
Հարցին, թե որքանո՞վ է արվեստը քաղաքականացված` Սևակ Գրիգորյանը պատասխանեց, որ քաղաքականությունը, ի տարբերություն արվեստի, այնքան էլ մաքուր դաշտ չէ: Նա նաև նշեց, որ յուրաքանչյուր մեծահարուստ ոչ թե պետք է խանգարի արվեստագետին, այլ իր հնարավորության չափով օգնի. «Եվ երբ ամեն տեղ գրում են վատ արվեստ, վատ մշակույթ, դա անպայման ազդելու է ժողովրդի հոգեբանության վրա»:
