Ի՞նչ է կատարվում իշխանություն-ընդդիմություն-նախագահ եռանկյունում. քաղաքական առևտուր: «Առաջին լրատվական»-ի հետ զրույցում այս կարծիքը հայտնեց «Հանուն հանրապետության» ԺՊԴԿ անդամ Վահագն Մարտիրոսյանը: Նրա դիտարկմամբ՝ նախագահի այսօրվա քայլը անակնկալ էր «17+»-ի համար. «Նրանք համոզված էին, որ նախագահն իրենց կողմն է բռնել, բայց մեծ անակնկալի եկան»:
«Կարծում եմ՝ քաղաքական առևտրի մի կողմն էլ եղել է Փաշինյանը: Փաշինյանը հենց նախագահի հետ է «առևտուր» արել, և իմ սուբյեկտիվ տպավորությամբ՝ նախագահի կողմից հրամանագրի նախագծի առաջին վերադարձը պայմանավորված է եղել Փաշինյանի հետ, որպեսզի ապահովագրվեն որոշակի իրավիճակներից, օրինակ՝ որպեսզի գլխավոր շտաբի գեներալները չհայտնվեն Բաղրամյան պողոտայում:
«17+»-ի ներկայացուցիչների հանդիպումը նախագահի հետ վկայում է անակնկալի մասին. նրանց համար անսպասելի էր նախագահի այդ քայլը: Նախագահը ՍԴ չդիմեց ԳՇ պետին ազատելու հարցի վերաբերյալ, այլ դիմեց այդ օրենքի սահմանադրականությունը վիճարկելու համար: Իրավական առումով դրանք տարբեր հարցեր են: Նախագահը, ինչպես և քաղաքական դաշտում խաղացողները, իր համար դիվիդենտներ է քաղում»,- նշեց Մարտիրոսյանը:
«Քաղաքացու որոշում» կուսակցության ղեկավար մարմնի անդամ Հայկ Սահակյանը կարծիք հայտնեց, որ հրապարակում գտնվող ուժերը քաղաքացիներից տարանջատվել են, նրանք չեն սպասարկում քաղաքացու շահերը, այլ մի կողմը իշխանության գալու, մյուսը՝ իշխանությունը պահելու նպատակ են հետապնդում, և հանրությունը դրան արձագանքում է հանրահավաքներին պասիվ մասնակցությամբ:
Վերլուծաբան Դավիթ Ստեփանյանը կարծիք հայտնեց, որ ԳՇ քայլը պատվաբեր չէ: Նրա խսքով՝ Օնիկ Գասպարյանից ոչ ոք այդպիսի հայտարարություններ չէր սպասում:
«ԳՇ-ի, բանակի ղեկավարության պահվածքը շատ տարօրինակ է, և ինձ թվում է, որ այստեղ ոչ միայն «17+»-ի մատն է խառը, այլ կան նաև արտաքին գործոններ, ավելի շատ Ռուսաստանի գործոնը, քանի որ, իմ կարծիքով, Ռուսաստանի համար Նիկոլ Փաշինյանը գնալով ավելի մեծ վտանգ է ներկայացնում: Առաջին հայացքից թվում է, թե Փաշինյանը պատերազմից հետո ամբողջությամբ ռուսական տիրույթում է, բայց կան հարցեր, որոնց առումով նա կարող է կամակորություն դրսևորել, ինչպես եղավ «Իսկանդերի» դեպքում: Ռուսաստանը վտանգներ է տեսնում, որ հնարավոր է հայ-թուրքական հարաբերություններ հաստատվեն՝ առանց Ռուսաստանի միջամտության: Եվ հնարավոր է, որ գեներալների բունտը դրա հետ կապ ունի»:
Մանրամասն՝ տեսանյութում:
