2020 թվականը Հայաստանի համար անասելի ծանր տարի էր։ Շատերը խոսում են այն մասին, որ, եթե մենք իբրև հանրություն չկարողանանք ոտքի կանգնել, սթափվել և մոբիլիզացվել, ապա շատ հավանական է, որ մենք կորցնենք նաև Հայաստանը։
Դուք զգո՞ւմ եք այդ նախադրյալները, որ մոբիլիզացիան գնում է դեպի ապագա, դեպի կոնսոլիդացիա․ «Առաջին լրատվական»-ի հարցին «Քաղաքացու որոշում» կուսակցության գործադիր մարմնի քարտուղար Գոռ Հակոբյանը պատասխանեց․ «Ես հիմա ավելի շատ գտնում եմ, որ մարդիկ դեռևս մտածում են։ Կարծես՝ մի տեսակ վերաիմաստավորման, վերաարժևորման շրջան լինի։ Սա նաև մի շրջան է, որտեղ մարդիկ բազմաթիվ կասկածներով են, տագնապներով են, վախերով են․ կա ճնշվածություն, կա ցասում, կա վրեժ։ Կարծում եմ՝ էս շրջանում մենք նման էմոցիոնալ վիճակի մեջ ենք, բայց այս շրջանը նաև մտածելու փուլ է։
Ամեն տարի տարեվերջին մենք ֆեյսբուքյան ասուլիս ենք ունենում։ Երեկ մեր տարեվերջյան ասուլիսում մի շատ կարևոր բան կար մեզ ուղղված հարցերում, որը որոշ իմաստով մեզ նույնիսկ հանկարծակիի բերեց։ Երբ հարցը ձևակերպվում էր, անպայման նշվում էր՝ խնդրում եմ կոնկրետ՝ կենացներ չասեք։ Այսինքն՝ որոշակի առումով մարդիկ հասկացել են և լոլոներով, ճառերով՝ մենք այսպես կանենք, այնպես կանենք, մարդկանց չես կերակրի։ Սա շատ հետաքրքիր փոփոխություն է, որ մարդիկ ուզում են հասկանալ, թե իրականում ինչ է կատարվել և ինչ են ուզում անել։ Եվ սա ինչքան էլ տարօրինակ թվա, ճգնաժամերը հնարավորություն են տալիս, որպեսզի վերագնահատելով կարողանանք նոր լուծումներ ձեռք բերենք»։
