Ադրբեջանական ԶՈի-կողմից լայնորեն կիրառվել են կասետային զենքեր՝ և՛ ռումբեր, և՛ հրթիռներ, և՛ արկեր: Կասետային զնեքերը կիրառվել են նաև քաղաքացիական բնակչության դեմ: Այս մասին ասուլիսում ասաց Արցախի ՄԻՊ Արտակ Բեգլարյանը` հավելելով, որ մի շարք նման ապացույցներ արդեն ունեն:
«Արցախի արտակարգ իրավիճակների պետական ծառայությունը մինչև հոկտեմբերի 10-ը ավելի քան 180 չպայթած կասետային զենք է ոչնչացրել, բազմաթիվ դեպքերում պայթել են: Այստեղ կան որոշակի զինատեսակներ, օրինակ 300 մմ-ոց հրթիռը, որն իսրայելական արտադրության է, այն կիրառվել է հենց Ստեփանակերտի կենտրոնում, մասնավորապես մեզ համար կենսական նշանակության ենթակառուցվածքների դեմ և դրա հետևանքով մենք ունեցել ենք բազմաթիվ վիրավորներ, և այդպիսի դեպքեր եղել են առաջին օրերից մինչև երեկ գիշեր: Երեկ գիշեր, հրադադարի պահմանավորվածությունից հետո նրանք օգտագործել են նոր հրթիռ: Ես անձամբ այցելել եմ դեպքի վայր, տունը վնասված է և վառված է նաև տան հարակից շինությունը և այնտեղ մենք գտել ենք կասետային «Սմերչ» տեսակի հրթիռից մնացորդներ: Սա էլ լրացուցիչ ապացույց է, որ նույնիսկ հրադադարի պայմանավորվածությունից հետո նրանք կիրառում են ոչ միայն հրթիռներ, այլ նաև միջազգային իրավունքով արգելվածշն հրթիռներ»,-ասաց նա: Արցախի ՄԻՊ-ը նշեց, որ կիրառել են նաև իսրայելական և թուրքական արտադրության տարբեր տեսակի ԱԹՍ-ներ:
Արտակ Բեգլարյանն ընդգծեց,որ Արցախի ժողովուրդը կանգնած է հումանիտար աղետի առաջ, քանի որ Ադրբեջանը կիրառում է արգելված տեսակի զենքեր, որոնք կարող են երկար տարիներ վտանգել քաղաքացիական բնակչության և հատկապես՝ երեխաների կյանքն ու առողջությունը: «Մենք կանգնած ենք հումանիտար աղետի առաջ։ Եվ Ստեփանակերտում, և մնացած բնակավայրերում կան հազարավոր, եթե ոչ տասնյակ հազարավոր չպայթած պայթուցիկ նյութեր, որոնք երկար տարիներ կարող են վտանգել քաղաքացիական բնակչության և հատկապես՝ երեխաների կյանքն ու առողջությունը:
Ես սա հատուկ կուզեի կարևորել, որովհետև ես ինքս 6 տարեկան հասակում վիրավորվել եմ ադրբեջանական ականի պայթյունից պատերազմից հետո և կորցրել եմ տեսողությունս։ Ինձ նման հարյուրավոր երեխաներ կորցրել են իրենց կյանքը կամ առողջությունը։ Ոչ միայն երեխաներ, սակայն նրանց շրջանում այդ դեպքերը շատ են եղել»,-նշեց Բեգլարյանը:
Արցախի ՄԻՊ-ի խոսքով՝ ադրբեջանական զինված ուժերը միտումնավոր են խիտ բնակեցված շրջաններում արգելված զինատեսակներ կիրառում, որպեսզի հումանիտար աղետի առջև կանգնեցնեն քաղաքացիական բնակչությանը:
ՄԻՊ-ի խոսքով՝ միջազգային հանրությունը մեծ անելիք ունի հումանիտար այս աղետը օր առաջ դադարեցնելու ու կանխարգելելու ուղղությամբ:
Մանրամասն՝ տեսանյութում:
