Վրացական GHN լրատվական գործակալության փոխանցմամբ՝ Վրաստանի փոխարտգործնախարար Նինո Կալանդաձեն ողջունել է Աբխազիայի նախագահի պարտականությունների ժամանակավոր պաշտոնակատար Ալեքսանդր Անկվաբի հայտարարությունը, որը հայտարարել է, թե Աբխազիան պատրաստ է առանց որևէ նախապայմանի բանակցություններ սկսել Վրաստանի հետ.
«Վրացական կողմի համար ընդունելի են բոլոր կառուցողական առաջարկները, որոնք առնչվում են հակամարտությունների կարգավորմանն ու երկխոսությանը, փախստականների վերադարձին։ Վրացական կողմը պատրաստ է ցանկացած ձևաչափով բանակցություններ սկսել այն բոլոր անձանց հետ, ովքեր պատասխանատու են այդ հարցի համար»։
Հիշեցնենք, որ օրեր առաջ էլ Կալանդաձեն ապօրինի էր որակել օգոստոսի 26-ին տեղի ունենալիք Աբխազիայի նախագահական ընտրությունները. «Վրաստանը և միջազգային հանրությունն Աբխազիայի ինքնահռչակ հանրապետության արտահերթ նախագահական ընտրությունները դիտարկում են որպես ապօրինի։ Վրաստանը հատուկ ակնկալիքներ չունի այդ ապօրինի ընտրություններից։
Ելնելով նրանից, որ Աբխազիայի տարածքում ընտրություններ են անցկացվելու Վրաստանի օրենսդրության խախտմամբ՝ այդ ընտրությունները և դրանց արդյունքներն ապօրինի են։ Ընտրությունները տեղի են ունենալու օկուպացման պայմաններում և օկուպացիոն ռեժիմի դիտարկման ներքո։
Աբխազիայի վտարված բնակչության մեծ մասը հնարավորություն չունի մասնակցելու այդ ընտրություններին։ Հետևաբար խախտվում են ընտրությունների օրինականությանն առնչվող բոլոր բաղկացուցիչները»։
