ԱՄՆ նախկին փոխնախագահ, նոյեմբերի 3-ին կայանալիք նախագահական ընտրություններում Դեմոկրատական կուսակցության թեկնածու Ջոզեֆ Բայդենը ավելի քան ութ ամիս աառաջ Թուրքիայի վերաբերյալ կոշտ հայտարարություններ էր արել, որը բուռն կերպով քննդատվում է Թուրքիայի տարբեր պաշտոնյաների կողմի։ «Մենք այժմ պետք է Էրդողանի նկատմամբ միանգամայն այլ մոտեցում որդեգրենք։ Հարկավոր է հստակեցնել, որ ընդդիմության առաջնորդները վայելում են մեր աջակցությունը», – հայտարարել է Բայդենը` նշելով, որ ժամանակին այս քաղաքականությունն իրեն արդարացրել է, երբ նախորդ ամերիկյան վարչակազմին հաջողվել էր նպաստել քրդերի ինտեգրմանը Թուրքիայի քաղաքական համակարգին։ Բայդենի պնդմամբ` Վաշինգտոնի վերջնական նպատակը պետք է լինի Ռեջեպ Թայիփ Էրդողանի պարտությունը ընտրություններում։ «Նա պետք է հստակ գին վճարի։ Մենք պետք է ուղղակի շփումների մեջ մտնենք թուրքական վերնախավի որոշ շրջանակների հետ։ Դա այն էր, ինչ ես անում էի նախկինում։ Մենք պետք է քաջալերենք այդ մարդկանց, որպեսզի նրանք Էրդողանին պարտության մատնեն։ Եվ դա պետք է տեղի ունենա ոչ թե հեղաշրջման, այլ ընտրական գործընթացների միջոցով»,- ասել է Բայդենը։
Կարո՞ղ է Թուրքիայի իշխանությունների դեմ Բայդենի այս հայտարարությունները ԱՄՆ հայ համայնքին միավորել իր շուրջ, թե ոչ։ Քաղաքագետ Ստեփան Գրիգորյանը «Առաջին լրատվական»-ի հետ զրույցում դժվարացավ հստակ ասել՝ արդյոք Բայդենի այս հայտարարությունը կարող է ազդակ լինել, որպեսզի հայ համայնքն ընտրություններում աջակցի Բայդենին։ «Նախ պետք է հասկանալ հայ համայնք ասելով ինչ ենք հասկանում։ Այնտեղ կան ազդեցիկ ավանդական կուսակցություններ, լոբբիստական կազմակերպություններ, կան վերջին շրջանում ԱՄՆ գնացած հայեր, որոնք տարբեր մոտեցումներ ունեն։ Դժվարանում եմ ասել՝ սա կարող է ազդակ լինել, որ հայ համայնքը միանշանակ աջակցի Բայդենին»,- ասաց Գրիգորյանը։ Նրա խոսքով՝ կամ մեկ հանգամանք, որը հայ համայնքը պետք է հաշվի առնի։ Այն է, հենց Թրամփի ադմինիստրացիայի օրոք Կոնգրեսը ճանաչեց Հայոց ցեղասպանությունը։ «Բոլորը գիտեն, եթե գործող ադմինիստրացիան դեմ է, անգամ ընդդիմադիր ներքին պալատը չէր ճանաչի Հայոց ցեղասպանությունը։ Թրամփի ադմինիստրացիան չեզոքություն պահպանեց։ Հիմա այս նախագահին ձայն տալ, թե մեկ այլ թեկնածուի, դժվարանում եմ ասել։ Չեմ կարծում միանշանակ պատասխան կա։ Թրամփի օրոք Կոնգրեսը ճանաչեց Հայոց ցեղասպանությունը։ Դա չգնահատել, դժվար է։ Այնտեղի մեր լոբբիստական կազմակերպությունները բավական մեծ պոտենցիալ ունեն, իրենք կորոշեն, կուսումնասիրեն ամեն ինչ։ Բայց իմ ասած գործոնը հաշվի չառնել չեն կարող։ Կարծում եմ դա որոշիչ կլինի։ Հայ համայնքը կա՛մ կաջակցի Թրամփին, կա՛մ ոչ ոքի»,- տեսակետ հայտնեց քաղաքագետը։
Գրիգորյանը ավելի հակված է կարծել, որ հայ համայնքը նախագահի թեկնածուներից ոչ ոքի չի աջակցի, քանի որ, ըստ քաղաքագետի, անշնորհակալություն կլինի Թրամփի նկատմամբ։ «Ուղղակի այստեղ բարոյական հարցեր էլ կան։ Ես չեմ ասում, որ հիացած եմ Թրամփի քաղաքականությամբ, բայց Ցեղասպանության ճանաչումը լուրջ գործոն է։ ԱՄՆ-ում գործող մեր հայկական կազմակերպությունների անդամները ինտելեկտուալ են, ազդեցիկ, իրենք կկարողանան ճիշտ որոշում կայացնել»,- վստահություն հայտնեց Ստեփան Գրիգորյանը։
Հարցին՝ ինչպե՞ս կգնահատեք դեմոկրատ թեկնածուի շանսերը, արդյոք կա՞ն արդեն իսկ ուրվագծվող հնարավոր ֆավորիտներ, Գրիգորյանը նշեց՝ այսօրվա զարգացումներին նայելով կարելի է ասել, որ Թրամփը կվերընտրվի։ «Ես տեսնում եմ այդ տենդենցը։ Այն ներքին քաղաքականությունը, որն ինքը վարում է, Ամերիկայի ժողովրդի համար ընդունելի է, աջակցություն ստանում է։ Թրամփն ամեն ինչ անում է, որ ամերիկյան խոշոր կորպորացիաները ոչ թե գործարանները կառուցեն տարբեր երկրներում, այլ՝ հենց ԱՄՆ-ում: Կորպորացիաները Կառավարությունից մեծ առավելություն են ստանում, երբ գործարանները կառուցում են երկրում: Թրամփը արտաքին քաղաքականության ոլորտում շատ ագրեսիվ քաղաքականություն է վարում: Դեմոկրատները ավելի մեղմ էին: Թրամփը կարողացավ երկրի կշիռը բարձրացնել: Թրամփը դուրս եկավ մի շարք միջազգային կառույցներից, որը դրական է ընդունվել Ամերիկայի ժողովրդի կողմից»,- իր խոսքը եզրափակեց քաղագետ Ստեփան Գրիգորյանը:
