Ֆրանսիայի զինված ուժերի նախարար Ֆլորանս Պառլին հաստատել է իր երկրի մտադրությունը՝ շարունակելու աֆրիկյան Սահելի գոտում (Բուրկինա Ֆասո, Մավրիտանիա, Մալի, Նիգեր, Չադ) ահաբեկիչների և արմատական իսլամիստների դեմ պայքարի «Բարխան» գործողությունը՝ չնայած Մալիում տեղի ունեցած հեղաշրջանը: Նախարարի հայտարարությունը հրապարակվել Է Twitter-ի նրա էջում:
«Բարխան» գործողությունը, որն իրականացվում է մալիական կողմի խնդրանքով և ՄԱԿ-ի Անվտանգության խորհրդի թույլտվությամբ, շարունակվում է: Ֆրանսիացի զինվորականները Եվրոպայի և Սահելի երկրներից իրենց գործընկերների հետ համատեղ շարունակում են այդ առաքելության իրագործումը ամբողջ անհրաժեշտ պատրաստվածությամբ և ի շահ ընդհանուր անվտանգության ապահովման»,- հայտնել է գերատեսչության ղեկավարը:
Ֆրանսիան «Բարխան» ռազմական հակաահաբեկչական գործողությունն սկսել է 2014 թվականի օգոստոսին: Այն դարձել է «Սերվալ» գործողության շարունակությունը, որը ֆրանսիացի զինվորականներն իրականացրել են 2013 – 2014 թվականներին Մալիում: Ուժային գերատեսչությունների տվյալներով՝ գործողությանն ընդհանուր առմամբ մասնակցում է ավելի քան 5 հազար մարդ: Բացի ֆրանսիացի զինվորականներից, գործի են դրված Իսպանիայի, Մեծ Բրիտանիայի, Դանիայի, Չեխիայի և Էստոնիայի զինված ուժերի ստորաբաժանումներ, օգտագործվում են տասնյակ ռազմակայաններ Աֆրիկայի տարածքում, դրանցից երկուսը գտնվում է Մալիում:
Այս տարի Ֆրանսիայի ղեկավարությունը բազմիցս խոստովանել է, որ Մալիում ավելի ու ավելի բացասաբար են վերաբերվում ֆրանսիացի զինվորականներին: Այդ առնչությամբ նա բազմիցս Մալիի իշխանություններին կոչ է արել բարելավել իրավիճակն այդ ոլորտում՝ ընդգծելով, որ դա խոչընդոտում է զորակազմի առաքելության բնականոն կատարմանը:
