Գերմանիայի արտգործնախարար Հայկո Մաասը հայտարարել է, որ դեմ է Ռուսաստանի մասնակցությանը G7- ի նիստերին, քանի դեռ չի լուծվել ուկրաինայի հարցը:
Rheinische Post-ին տված հարցազրույցում նա նշել է, որ «Ղրիմի բռնակցումը և Ուկրաինայի արևելքում միջամտությունը» հիմք են հանդիսացել «մեծ ութնյակի» կազմից Ռուսաստանին հանելու համար․ քանի դեռ այդ հարցերը լուծված չեն, նրա կարծիքով, նրա վերադարձի համար «ոչ մի հնարավորություն» չկա:
Գերմանիայի արտգործնախարարը խոստովանել է, որ վերջերս Ռուսաստանի հետ հարաբերություններում «մշտապես դժվարություններ են առաջ գալիս», սակայն ասել է. «Մենք նաև գիտենք, որ Ռուսաստանը պետք է մեզ այնպիսի խնդիրների լուծման համար, ինչպիսիք են Սիրիայում, Լիբիայում և Ուկրաինայում առկա հակամարտությունները։ Սա աշխատանք է լինելու ոչ թե Ռուսաստանի դեմ, այլ միայն Ռուսաստանի հետ միասին»:
«Բայց Ռուսաստանը նույնպես պետք է իր ներդրումն ունենա, ամեն ինչ շատ դանդաղ է տեղի ունենում Ուկրաինայում», – հավելել է դիվանագետը:
Նախարարի խոսքով, ընդհանուր առմամբ, G7- ի ընդլայնման անհրաժեշտություն չկա, ինչպես նախկինում առաջարկել էր ԱՄՆ նախագահ Դոնալդ Թրամփը:
«G7- ը և G20- ը երկու խելամիտ համակարգված ձևաչափեր են: Մեզ պետք չէ G11 կամ G12», – ասել է Մաասը:
Ավելի վաղ Թրամփն առաջարկել էր ընդլայնել G7 ձևաչափը՝ այնտեղ հրավիրելով Ռուսաստանին, Հնդկաստանին, Ավստրալիային և Հարավային Կորեային:
