ՉԺՀ-ից արտագաղթելու ցանկություն ունեցող Հոնկոնգի բոլոր բնակիչները կկարողանան մասնակցել Մեծ Բրիտանիայում աշխատանքի թույլտվություն, իսկ հետագայում նաև Թագավորության քաղաքացիություն ստանալու ծրագրին՝ 2021թ.-ի հունվարից, հաղորդում է Associated Press-ը՝ Մեծ Բրիտանիայի արտաքին գործերի նախարարության հայտարարությանը հղումով:
«Այսօրվա հայտարարությունը ցույց է տալիս, որ Միացյալ Թագավորությունը իր խոսքի տերն է. մենք երես չենք թեքում Հոնկոնգի բնակիչներից և մենք չենք խուսափում մեր պատմական պատասխանատվությունից»,- հայտարարել է արտաքին գործերի նախարար Դոմինիկ Ռաաբը:
Իշխանությունների որոշմամբ, բրիտանական անդրծովյան տարածքների բնակչի անձնագիր ունեցող Հոնկոնգի բոլոր բնակիչները, ինչպես նաև նրանց հարազատները, Մեծ Բրիտանիայում առանց վիզայի վեց ամիս մնալու հնարավորություն կստանան: Եթե նրանք աշխատանք գտնեն, ապա կկարողանան 5 տարի բնակվել երկրում: Դրանից հետո նրանք արդեն կարող են դիմել Մեծ Բրիտանիայի քաղաքացիություն ստանալու համար:
Նրանք մուտք կունենան բրիտանական աշխատաշուկա՝ առանց աշխատավարձի սահմանաչափի, նշում է գործակալությունը:
Լոնդոնը նման միջոցներ է ձեռնարկել ի պատասխան Պեկինի կողմից ընդունված Հոնկոնգի ազգային անվտանգության օրենքի, որը խախտում է տարածաշրջանի ինքնավարության վերաբերյալ բրիտանա-չինական պայմանավորվածությունները:
1997թ.-ին Բրիտանիան Հոնկոնգը հանձնել է Չինաստանին «Մեկ երկիր՝ երկու համակարգ» պայմանով: Քաղաքը պետք է պահպաներ ինքնավարությունը, իսկ նրա բնակիչները՝ քաղաքական լայն իրավունքները, ներառյալ խոսքի և հավաքների ազատությունը՝ մինչև 2047թ.-ը: Ազգային անվտանգության մասին օրենքի ընդունումից հետո ՉԺՀ-ի իշխանությունները մեծ հնարավորություններ ունեն տարածաշրջանում քաղաքացիական ազատությունները սահմանափակելու համար:
