«Ժառանգություն» խմբակցության պատգամավոր Լարիսա Ալավերդյանը, գնահատելով ՀԱԿ – իշխանություն երկխոսությունը, լրագրողների հետ հանդիպմանը ասաց. «Այդ երկխոսության գլխավոր դերը իրականում գոյություն ունեցող պրոբլեմներից հասարակության ուշադրությունը շեղելն է: Երկրում օրեցօր վիճակը ծանրանում է սոցիալական և տնտեսական ոլորտներում, իսկ մենք խոսում ենք քաղաքական ուժերի, կներեք՝ ինչ որ ցուցադրական գործընթացից: ՀԱԿ-ը և գործող իշխանությունները հասարակության մոտ հանդես են գալիս նույն քաղաքական դիրքորոշումով, և ամենաանհանգստացնողն այն համընկումն է, որ կա առաջին, երկրորդ, երրորդ նախագահների՝ Արցախի հարցում ցուցաբերած սկզբունքների մեջ: Հայաստանի համար Արցախի հարցը մի գավառի հարց չէ, և նրանք, ովքեր բաժանում են Արցախի խնդիրը Հայաստանի խնդրից, ուղղակի կարճատեսներ են»:
Ալավերդյանը երկխոսությունը որակեց որպես պաշտոններ բաժանելու և սակարկելու գործընթաց: «Ես չեմ տեսնում, որ այս երկխոսությունն իր մեջ պարունակում է համակարգային փոփոխություններ: Շարժվելով երկու անգամ կեղծված սահմանադրությամբ՝ մենք չենք հասնելու համակարգային փոփոխությունների»,- նշեց Ալավերդյանը և հավելեց, որ պետք է առաջիկա ընտրություններում բացառենք առաջին, երկրորդ ու երրորդ նախագահների մասնակցությունը և օրակարգային դարձնենք սահմանադրական փոփոխությունները:
Ալավերդյանը ՀԱԿ-ի գործունեությունը դրական գնահատեց այն առումով, որ սկսած 2008 թվականից պահվել է բողոքի ալիքը: Խոսելով Մարտի 1-ի իրական կորուստների մասին՝ Լարիսա Ալավերդյանը նշեց, որ արյունը թափվել է, որովհետև Ռոբերտ Քոչարյանը չէր ուզում զիջել Լևոն Տեր-Պետրոսյանին: Նա նաև ՀԱԿ-ին որակեց որպես մակերևույթային ընդդիմություն, որովհետև թույլ է տալիս իշխանություններին վերարտադրել համակարգը: «Ժառանգության» պատգամավորը նաև հավելեց, որ դրսի այն ուժերը, որոնք աչք են փակում հայաստանյան իշխանության ոչ լեգիտիմության վրա, միայն Արցախի հարցի գնով են աչք փակում:
