Հուլիսի 4-ին Ստեփանակերտում ՀՀ ԱԳ նախարար Զոհրաբ Մնացականյանը հանդիպել է Ադրբեջանից հայ փախստականների միության, Արցախի ժուռնալիստների միության, Ստեփանակերտի մամուլի ակումբի, Շուշիի կանանց ռեսուրսային կենտրոնի, Երիտասարդության միջազգային քրիստոնեական միության (YMCA), Քաղաքացիական նախաձեռնությունների կենտրոնի և Ժողովրդական դիվանագիտության ինստիտուտի ղեկավարների հետ:
ԱԳՆ լրատվական ծառայությունից հայտնում են, որ նախարար Մնացականյանը կարևորել է նման ձևաչափով հանդիպումների անցկացումը, որը լավ հնարավորություն է ծանոթանալու հարցերի լայն շրջանակի շուրջ Արցախի քաղաքացիական հասարակության տեսակետներին:
Հայաստանի ԱԳ նախարարը ներկայացրել է Լեռնային Ղարաբաղի խաղաղ կարգավորման գործընթացում ՀՀ մոտեցումները և կարևորել քաղաքացիական հասարակության դերը հումանիտար ոլորտի շփումներում։
Հանդիպման մասնակիցներից Ադրբեջանից հայ փաստականների Արցախի միության նախագահ Սարո Սարյանն «Առաջին լրատվական»-ի հետ զրույցում ասաց, որ հանդիպումից գոհ է, հնարավորություն է ընձեռվել վեր հանելու իրենց հուզող խնդիրները. «Սա առաջին հանդիպումը չէր, մի անգամ էլ առանձին մեր միության հետ է հանդիպել նախարար Մնացականյանը, և պայմանավորվածություն է ձեռք բերվել, որ այստեսակ հանդիպումները շարունակական են լինելու, ինչը միանշանակ ողջունելի է: Փախստականների թեման հիմնականն ու ամենակարևորն է, մեր համագործակցությունը եղել է և պետք է շարունակվի հենց այս հարցի շուրջ»:
Սարյանը ներկայացրել է իրենց հուզող խնդիրները. «Ասել եմ, որ գրասենյակ չունենք, կենտրոնական գրասենյակը մի փոքր սենյակ է, որտեղ հյուրեր չենք կարողանում ընդունել: Բանակցության պրոցեսը որ սկսվի, մենք նորմալ տեղ չենք ունենալու այդ մարդկանց ընդունելու, լրագրողներին ընդունելու համար: Իհարկե, շատ կարևոր էր հանդիպումը, լավ է, որ կարողացանք մի շարք հարցեր բարձրացնել: Մենք անդրադարձել ենք մեր հին զրույցին, թե ինչով է փախստականների իրավիճակը տարբերվում, ինչ առանձնահատուկ, ղարաբաղցիների ասած, տաքություն եմ զգում, մենք շատ լավ ենք տրամադրված, բոլոր ներկաների տրամադրվածությունը շատ բարձր է եղել»:
Սարո Սարյանն ընդգծեց՝ թեպետ խաղաղության հաստատման վերաբերյալ կոնկրետ քննարկում չի եղել, բայց իր ընկալմամբ՝ Հայաստանն իր կողմից նման մեսիջներ է ուղարկում. «Վերջինն էլ լրագրողների փոխայցելությունն է, որը դրական է և պետք է շարունակական բնույթ կրի: Զոհրաբ Մնացականյանն էլ ընդգծեց, որ ձախողում չկա բանակցություններում, ինչը դրական է»:
Հարցին՝ ինքը կո՞ղմ է խաղաղություն հաստատելուն, մեր զրուցակիցը պատասխանեց. «Այո՛, հասկանալի է, որ դա անհրաժեշտ է սահմանում զոհեր չլինելու համար»:
Հանդիպմանը ներկա Շուշիի կանանց ռեսուրսային կենտրոնի նախագահ Գայանե Համբարձումյանն «Առաջին լրատվական»-ի հետ զրույցում ասաց՝ սա նախարար Մնացականյանի հետ առաջին հանդիպումն էր և կրում էր ավելի շատ ճանաչողական բնույթ:
«Չեմ կարող մանրամասները ներկայացնել, բայց հանդիպումը հետագա համագործակցության համար էր: Որոշ բաներ ինքը ներկայացրեց, մեր կարծիքներն ու առաջարկությունները լսեց: Ներկա էին ոչ բոլոր հասարակական կազմակերպությունները, բայց լսեց բոլոր ներկաների բարձրացրած հարցերը: Ես հանդիպումից շատ գոհ եմ, շատ կարևոր է, որ լսում ու հաշվի են առնում հասարակական կազմակերպությունների տեսակետները»,- նշեց նա:
