«Բարգավաճ Հայաստան» կուսակցությունը կառավարության հրաժարականի պահանջից հետո հայտարարում է ինտենսիվ քաղաքական շփումների և խորհրդակցությունների մասին՝ չնշելով, սակայն, կոնկրետ անուն:
Այս օրերին շատ է քննարկվում, թե որն էր կառավարության հրաժարական պահանջելու Գագիկ Ծառուկյանի մոտիվը: Ծառուկյանի քայլում մեկ մոտիվ փնտրելը իրավիճակի համարժեք գնահատական չէ: Մոտիվները ոչ միայն կարող են լինել, այլև պարզապես շատ են: Դրանց թվում է և այն, որ ԲՀԿ նախագահը կառավարության հրաժարականի պահանջով փաստացի ստեղծել է մի իրավիճակ, երբ գոնե առայժմ, այսպես ասած, իր տակն է գցել այդպիսի պահանջ ներկայացնող կամ այդպիսի օրակարգ ձևավորող մյուս ուժերին:
Տեղի է ունեցել բավականին հետաքրքիր մի բան: ԲՀԿ-ն միացել է պահանջներին և, դրանով հանդերձ, փաստորեն գլխավորել այդ չգրված, բայց արդեն բարձրաձայնված օրակարգը: Եվ պետք է նկատել թերևս, որ այդ օրակարգի տիրույթում իրադարձությունների ընթացքը առայժմ թելադրում է ԲՀԿ-ն, ինչը նաև իշխանության կոշտ արձագանքի շնորհիվ:
Խիստ, չոր և անգամ սպառնալից հռետորաբանությամբ բևեռացնելով ուշադրությունը ԲՀԿ-ի շուրջը՝ իշխանությունը փաստորեն Գագիկ Ծառուկյանի շուրջը մոբիլիզացրեց կառավարության հրաժարականի օրակարգը, որով փորձում էին աշխատել այլ ուժեր: Նրանք հիմա ստիպված են աշխատել ԲՀԿ-ի հետ: Այսինքն՝ երբ խոսվում է քննարկումների, կոնսուլտացիաների մասին, ապա մեծ մասամբ իրավիճակը հենց այն է, որ պայմաններ ու կանոններ այդ առումով թելադրում է հենց ԲՀԿ-ն:
Պատկերացնո՞ւմ էր Գագիկ Ծառուկյանն այդ էֆեկտը, թե՞ նա ընդամենը փորձում էր հետ չմնալ ընդդիմադիր գերակա դիրքի համար պայքարից: Դա արդեն հարցի մյուս կողմն է, ինչպես և այն, թե արդյոք հրաժարականի պահանջը Ծառուկյանի՞ նախաձեռնությունն է, թե՞ նրան հուշել են կամ հորդորել:
Բոլոր դեպքերում անկասկած է, որ ստացվել է բավականին հետաքրքիր էֆեկտ՝ այն տեսանկյունից, որ ԲՀԿ-ն փակել է վարչապետի պաշտոնանկության օրակարգ խաղարկելու մյուսների ճանապարհը, և այդ հարցում իր կոշտ վերաբերմունքով նկատելի աջակցություն է ցուցաբերել կառավարող ուժը:
Լուսանկարը՝ Armeniasputnik-ի
