Այսօր՝ մայիսի 14-ին, Ազգային ժողովում հրավիրվել է արտահերթ նիստ: Քննարկվում է արտակարգ դրության ռեժիմը մինչև հունիսի 13-ը, ժամը 17.00-ն երկարաձգելու կառավարության կայացրած որոշումը:
Անկախ պատգամավոր Արման Բաբաջանյանը հետաքրքրվեց, թե ինչպես է, որ տրանսպորտը բացվելու է մայիսի 18-ից, իսկ դիմակների պարտադիր կրումը` մայիսի 25-ից:
«Ուզում եմ հասկանալ, թե եկեղեցու հետ կապված ինչ կոմունիկացիա է եղել մայիսի 25-ից սկսած. ինչպե՞ս են մատուցվելու պատարագները և ժամերգությունները»,- փոխվարչապետ Տիգրան Ավինյանին հարցրեց նա:
Ի պատասխան` փոխվարչապետն ասաց. «Որոշ սահմանափակումներ ավելի ենք խստացրել և հանրային միջոցառումներին մասնակցող անձանց քանակը 20-ից նվազեցրել ենք 5-ի»:
Պատգամավորը ռիսկային է համարում մանկապարտեզների բացումը, քանի որ վարակը, ըստ միջազգային հեղինակավոր լրատվամիջոցների, ախտահարում է երեխաների ոչ միայն թոքերը, այլև երիկամները, սիրտը, նյարդային համակարգը. «Մենք չենք կարող երեխաներից պահանջել սոցիալական հեռավորություն և դիմակների կրում»:
Արման Բաբաջանյանը հետաքրքրվեց նաև, թե կա՞ն արդյոք ոստիկանական այնքան ռեսուրսներ, որպեսզի վերահսկեն մայիսի 25-ից նախատեսվող սահմանափակումները:
Մանրամասները՝ տեսանյութում:
