Երեխաները նույնպես կարող են վարակվել կորոնավիրուսով, բայց դեռ հայտնի չէ, կարող են արդյոք նրանք վարակի փոխանցող լինել: Այս մասին հաղորդում է «ՌԻԱ Նովոստին»՝ ԱՀԿ պատվաստման հարցերով փորձագետների եվրոպական տեխնիկական խորհրդատվական խմբի նախագահ Ադամ Ֆինին հղումով:
Նրա խոսքով, այս պահի դրությամբ հայտնի է, որ երեխաները հիվանդանում են վիրուսի թեթև ձևով:
«Վատն այն է, որ հայտնի չէ, թե որքան հաճախ են նրանք վարակվում այդ վիրուսով և որքան վարակիչ կարող են լինել նրանք այլ երեխաների և հենց ընտանիքի անդամների համար»,- ասել է Ֆինը:
Նա նշել է, որ Նիդեռլանդների և Ավստրալիայի փորձագետները արձանագրել են, որ երեխաները ավելի հազվադեպ են վարակվում, քան մեծահասակները:
Սակայն, ԱՀԿ ներկայացուցիչը նախազգուշացրել է, որ սրանք նախնական տվյալներ են և ավելի շատ ապացույցներ են անհրաժեշտ:
Նա շեշտել է, որ երեխաները վարակվում են կորոնավիրուսով, հետևաբար ցանկացած երաշխավորված հայտարարություն այն մասին, որ նրանք վիրուսը չեն փոխանցում մեծահասակներին՝ սխալ է:
