Մամուլի սահմանափակումները վերաբերում են բացառապես կորոնավիրուսի հետ կապված հրապարակումներին: Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Վահագն Հովակիմյանը՝ հավելելով, որ մամուլը ազատ է առավել քան երբևէ կառավարության նկատմամբ քննադատությունների տեսանկյունից:
«Ընդամենը պահանջվում է, որ կոնորավիրուսի հետ կապված հրապարակումները լինեն պաշտոնական լրահոսին համահունչ: Այլ կերպ ասած, եթե կա լրատվամիջոց, որ կարող է մտքով անցնի գործել ընդդեմ պետության, փորձի խուճապ տարածել, չտարածի»,-ասաց նա:
Հարցին, թե արդյո՞ք խուճապ է տարածում լրատվամիջոցը, որը տեղեկացնում է, որ ընկերություններից մեկի աշխատակիցներին ստիպում են բարձր ջերմությունով գալ աշխատանքի, որ դրանից հետո ոստիկաններ են այցելում, պատգամավորն արձագանքեց. «Կոնկրետ դեպքի հետ կապված չեմ կարող ասել, թե ինչն է եղել պատճառը, ինչու են ոստիկանները գնացել, բայց ես երևույթների մասին եմ խոսում: Որ մարդուն ասում ես՝ խուճապ մի տարածի, ինքը քեզ պատասխանում է, որ դու իմ խոսքի ազատությունը սահմանափակում ես: Սրա մասին եմ խոսում: Ոնց որ քեզ ասի՝ բա իմ բան ու գործը խուճապ տարածելն է»:
