Արագածոտնի մարզը զբոսաշրջության զարգացման նոր ծրագրեր է նախատեսում: ՀՀ Արագածոտնի մարզպետ Դավիթ Գևորգյանը նշեց, որ սովորաբար զբոսաշրջիկների այցելությունների համար առանձնացվում են ավանդական մի քանի վայրեր: Իրենք նպատակ ունեն վերհանել աննկատ մնացած, սակայն պատմական արժեք ունեցող կարևոր զբոսաշրջային վայրերը:
«Տարիներ շարունակ մենք զբոսաշրջային նոր կետեր շատ քիչ ենք ունեցել, զբոսաշրջիկներին անընդհատ նույն տեղն ենք տարել:
Կարծում եմ, որ մենք պետք է այլ մոտեցում ցուցաբերենք և վերհանենք այլ զբոսաշրջային վայրերը: Մասնավորապես, մարզում ունենք պատմական արժեք ներկայացնող Դաշտադեմի ամրոցը, որի վերականգնման համար զգալի աշխատանքներ են իրականացվել, ներդրումներ են արվել: Մենք նախատեսում ենք այն տարբեր միջոցառումներով դարձնել զբոսաշրջային ակտիվ այցելությունների կենտրոն»,-ասաց Դավիթ Գրիգորյանը:
Կառավարության առաջարկով այս տարի Հայաստանում կանցկացվի Յարխուշտայի փառատոնը, և պատահական չէ, որ այն անցկացվելու է Դաշտադեմի ամրոցի հարակից հատվածում: Մարզպետը նշեց, որ նման միջոցառումները նպատակ ունեն հասարակության, այցելուների ուշադրությունը հրավիրելու նախկինում աննկատ զբոսաշրջային վայրերի վրա:
Զբոսաշրջային տեսանկյունից մարզում չբացահայտված վայրերից է Ծաղկեվանքը: Մարզպետը տեղեկացրեց, որ ներդրողների հետ արդեն պայմանավորվածություններ կան: Մոտակա հատվածում կառուցվելու են հյուրանոց, ռեստորան, ժամանցի վայր: Քննարկվում է այդ հատվածում ճանապարհի վերանորոգման հարցը:
Կոնկրետ ծրագրեր են իրականացվում գյուղական տուրիզմի զարգացման ուղղությամբ: Տուրիստական գյուղի մոդել ունենալու առաջին ծրագրերից Հայաստանում սկսել են իրականացվել Արագածոտնի մարզում՝ Լուսագյուղում: Մարզպետն առանձնացրեց այլ համայնքներ ևս, որոնք զբոսաշրջային տիպային գյուղ դառնալու բավական լավ պոտենցիալ ունեն:
