Ինչպես հաղորդում է «Ազատություն» ռադիոկայանի հայկական ծառայությունը՝ հղում անելով Gallup հետազոտական կենտրոնի վերջին ուսումնասիրությանը, նախկին Խորհրդային միության տարածքում բնակչության մեծ մասը նախընտրում է իր խնայողությունները պահել ազգային արժույթով։ Ընդ որում, զեկույցի համաձայն՝ ազգային արժույթի հանդեպ հավատարմությամբ հայաստանցիներրը ԱՊՀ տարածքում երկրորդ տեղն են զբաղեցնում. նրանց շուրջ 63%-ը իր խնայողությունները պահում է ազգային դրամով:
Ցուցակի առաջին հորիզոնականում Ադրբեջանն է, որտեղ ազգային մանաթը նախընտրում է բնակչության 75%, երրորդ տեղում՝ Ռուսաստանը, որտեղ ռուբլու կայունության մեջ վստահ է բնակչության կեսից ավելին՝ 56 %ը:
Ամենից քիչ իրենց ազգային արժույթին, ըստ Gallup-ի, հավատում են բելառուսցիները։ Այստեղ, ըստ զեկույցի, 22 %ը կամ հինգից մեկն է միայն խնայողությունները պահում բելառուսական ռուբլով, ինչը, ըստ փորձագետների, պայմանավորված է այդ արժույթի՝ անցած տարվանից սկսված արժեզրկմամբ:
Վստահության պակասի առումով երկրորդ տեղում է վրացական լարին. ազգային արժույթով իր խնայողությունները Վրաստանում պահում է բնակչության 28%-ը միայն, ինչը գրեթե երկու անգամ քիչ է Հայաստանում արձանագրված ցուցանիշից:
Ուսումնասիրության ընթացքում Gallup-ը պարզել է նաև նախկին Խորհրդային Միության բնակիչների վերաբերմունքը արտարժույթի նկատմամբ: Ըստ այդմ, տարածաշրջանում առաջատար է շարունակում մնալ ամերիկյան դոլարը, որին վստահում է գրեթե երեք անգամ ավելի շատ մարդ, քան եվրոպական միացյալ արժույթին՝ եվրոյին:
Այս ցուցանիշով առաջինը Տաջիկստանն է, որտեղ դոլարով իր խնայողությունները պահում է բնակչության կեսից ավելին՝ 51%-ը, մինչդեռ եվոյին հավատում է բնակչության ընդամենը 4%-ը: Գրեթե նույնն է պատկերը նաև ասիական մյուս երկրներում:
Հայաստանում ևս դոլարին վստահողների թիվը մեծ է՝ բնակչության 17%-ը, մինչդեռ եվրոյին՝ 9%-ը:
Gallup-ի հարցումների համաձայն, ծայրահեղ ցածր է ռուսական ռուբլու վարկանիշը. հավելյալ գումար ունենալու և խնայողություններ անելու դեպքում դրան նախապատվություն են տալիս միայն Տաջիկստանում, Բելառուսում, Ղրղըզստանում և Հայաստանում, սակայն՝ բնակչության մեկ տոկոսը միայն:
Gallup-ը ուսումնասիրությունն անցկացրել է 2010 թվականի ընթացքում մոտ երեք հազար հարցվածների շրջանում:
