Սահմանադրության փոփոխությունների հանրաքվեին դեմ «Ոչ»-ի քարոզչության շտաբ ձևավորելու ժամկետը լրացավ այսօր, և արդեն ակնհայտ է, որ խորհրդարանական ընդդիմադիր ուժերից որևէ մեկը «Ոչ»-ի շտաբ չի ձևավորելու։ Արդյո՞ք այս հանգամանքը խնդիրներ կարող է հարուցել: «Առաջին լրատվական»-ի հետ զրույցում անդրադառնալով այս հարցին՝ արդարադատության նախարար Ռուստամ Բադասյանը նշեց, որ եթե «Ոչ»-ի շտաբ չձևավորվի, դա չի կարող խնդիրներ հարուցել. «Դա օրենքով սահմանված հնարավորություն էր, որից ընդդիմադիր խմբակցությունները կարող էին օգտվել, բայց որոշում է կայացվել չօգտվել»:
Նախարարի խոսքով՝ սահմանված ժամկետում «Ոչ»-ի քարոզչության կողմ կարող է ձևավորել նաև առնվազն 50 քաղաքացիներից բաղկացած խումբը. «Սակայն եթե «Ոչ»-ի շտաբ չձևավորվի, դրա բացակայությունը որևէ իրավական հետևանք չի ունենա»:
Նախարարը, անդրադառնալով դիտարկմանը, որ ընդդիմախոսների կարծիքով՝ այս պարագայում հանրաքվեն հակասահմանադրական է, նշեց. «Երբ սահմանադիրը՝ բարձրագույն իրավաբանական ուժով փաստաթուղթ ընդունելու իրավասություն ունեցող հանրույթը՝ ժողովուրդը, ում պատկանում է իշխանությունը, ցանկանում է փոփոխություն կատարել Սահմանադրության մեջ, այստեղ հակաիրավական, հակաժողովրդավարական կամ սահմանադրական ոգուն դեմ գնացող գործողության մասին խոսելն ավելորդ է: Խաղի կանոնները որոշողը սահմանադիրն է»:
Ռուստամ Բադասյանը նաև ընդգծեց, որ կա հանրային պահանջ դատական իշխանության ոլորտում արմատական բարեփոխումներ իրականացնելու: Նախարարի խոսքով՝ իրավական ռիսկեր չկան, և ՍԴ այս կազմի հրաժարականի դեպքում արագ կձևավորվի նոր ՍԴ կազմը:
Մանրամասն՝ տեսանյութում:
