Ազգային ժողովի կայքում հրապարակվել է գործող Սահմանադրությունում փոփոխություններ կատարելու մասին օրինագիծը, որը ներկայացրել են «Իմ քայլը» խմբակցության պատգամավորները: Նախագծում առաջարկվում է նաև փոփոխել 213-րդ հոդվածը: Առաջարկվում է սահմանադրական փոփոխությամբ դադարեցնել ՍԴ նախագահի և անդամների պաշտոնավարումը:
Թեմայի շուրջ «Առաջին լրատվական»-ի հետ քննարկմանը մասնակցեցին վերլուծաբան Գոռ Մադոյանը և քաղաքագետ Էդգար Վարդանյանը:
«Առկա է սահմանադրական ճգնաժամ, ճգնաժամը լուծում է պահանջում, և չի կարելի այս պրոցեսը երկարաձգել, երկիրը չի կարող գոյատևել առանց դատական իշխանության ձևավորման: Հասարակությունը չունի վստահություն դատական իշխանության նկատմամբ… Ճգնաժամ է նաև այն առումով, որ ՍԴ-ն չի աշխատում իշխանության հետ»,- նշեց Էդգար Վարդանյանը՝ հավելելով, որ դատական իշխանությունը ընդդիմանում է հեղափոխությանը և ժողովրդավարական փոփոխություններին: Քաղաքագետի դիտարկմամբ՝ այս հարցը կարող է լուծել Ազգային ժողովը. «Հարցը վաղուց պետք է լուծված լիներ, բայց լավ է ուշ, քան երբեք»:
Գոռ Մադոյանի կարծիքով՝ ժողովրդավարական լեգիտիմության, հեղափոխության արժեքների պահպանման տեսանկյունից շատ ավելի նախընտրելի է սահմանադրական հանրաքվեի անցկացման տարբերակը:
Ինչո՞ւ Ազգային ժողովն ավելի վաղ չէր գնում այսպիսի միջամտության. ի պատասխան այս հարցի՝ վերլուծաբանը նշեց, որ մինչ այժմ ԱԺ-ն ավելի փափուկ տարբերակի կողմնակից էր. «Կարծում էին, որ վաղ կենսաթոշակի անցնելու նախագծով ՍԴ անդամները կհեռանան: ԱԺ-ն մարդասիրական միջանցքի տրամաբանությամբ էր շարժվում, որը սակայն չաշխատեց»:
Անդրադառնալով ԵԽԽՎ-ի և Բուքիքիոյի հայտարարություններին՝ Էդգար Վարդանյանը նշեց. «Միջազգային տարբեր կառույցներ կարող են ստանդարտիզացված մոտեցումներ ունենալ այսպիսի իրավիճակների վերաբերյալ, և չեն կարող չարձագանքել… Վենետիկի հանձնաժողովը շատ լավ հասկանում է, որ մենք դեռևս կայացած ժողովրդավարական պետություն չենք: Եթե դեռևս ժողովրդավարական ինստիտուտները կայացման փուլում են, ինչ խոսք կարող է լինել ճնշումների մասին: Վենետիկի հանձնաժողովն ընդունում է, որ դատական իշխանության նկատմամբ չկա հանրային վստահություն: Բոլորն էլ հասկանում են, որ ժողովրդավարության կայացման գործընթացն առաջ տանելու խնդիր ունենք, և ժողովրդավարական կառույցներն իրենց աջակցությունն են հայտնել»:
Մանրամասն՝ տեսանյութում:
