Հանրային խորհրդի նիստերի փոքր սրահում այսօր շուրջ երկու ժամ տևեց իշխող կոալիցիայի կազմած աշխատանքային խմբի և Հայ ազգային կոնգրեսի ձևավորած պատվիրակության անդամների առաջին հանդիպումը:
Հիշեցնենք, որ հանդիպմանը մասնակցում էին կոալիցիայի աշխատանքային խմբի վեց և ՀԱԿ-ի պատվիրակության հինգ անդամները:
Հանդիպման ավարտին Ազգային ժողովի Պետական-իրավական հարցերի մշտական հանձնաժողովի նախագահ Դավիթ Հարությունյանը լրագրողներին ասաց. «Այսօր առաջին հանդիպումն էր, որը տեղի ունեցավ Կոալիցիայի ներկայացուցիների և ՀԱԿ-ի ներկայացուցիների միջև: Մենք մտքեր փոխանակեցինք այն հարցերի վերաբերյալ, որոնք համարում ենք հրատապ, ներկայացրեցինք նաև մեր դիրքորոշումը, թե ինչպես ենք պատկերացնում այս երկխոսությունը: Բանն այն է, որ մեզ համար այս երկխոսությունը նոր քաղաքական մշակույթի ձևավորման հիմքն է: Մենք համարում ենք, որ յուրաքանչյուր ժողովրդավարական երկրում անհրաժեշտ է, որպեսզի լինի հարթակ, երբ իշխանությունը և ընդդիմությունը քննարկում են իրար հետ: Նման հարթակներ իհարկե կան, այդ թվում և խորհրդարանում, բայց այս հարթակը, երբ մենք քննարկում ենք ՀԱԿ-ի հետ՝ նման հարթակներից մեկն է: Հիմնական նպատակը հետևյալն է՝ անցնել բացարձակ հակամարտությունից դեպի ավելի համագործակցային աշխատանք, ինչն ամենևին չի նշանակում, որ քաղաքական տարաձայնությունները մեր միջև հարթվելու են: Բայց նման հարթակը հնարավորություն կտա, որպեսզի մենք լսենք միմյանց կարծիքը, խորհրդակցություններ անցկացնենք միասին և արտահայտենք յուրաքանչյուրի դիրքորոշումը և գնահատականը մյուսի դիրքորոշմանը»:
Ապա Դավիթ Հարությունյանը շատ կարևոր հայտարարություն արեց. «Բնականաբար, հարց ծագեց, թե մենք ո՞ւմ ենք ներկայացնում: Մենք ներկայացնում ենք կոալիցիային, ինչը նշանակում է՝ գործադիր իշխանությանը, որը ձևավորվել է կոալիցիայի կողմից, մենք ներկայացնում ենք խորհրդարանական մեծամասնությանը, մենք ներկայացնում ենք նաև հանրապետության նախագահին՝ որպես կոալիցիայի ղեկավար»,- ամրագրեց նա:
Դ.Հարությունյանը նաև տեղեկացրեց, որ այսօր քննարկում որպես այդպիսին տեղի չի ունեցել, այլ տեղի է ունեցել մտքերի փոխանակում. «Մեր կարծիքով, մեր գնահատականը դրական է և կարծում ենք, որ շատ շուտով մենք կկարողանանք գնահատել՝ արդյոք այս գործընթացը ունի՞ իր շարունակությունը, թե՞ չունի: Սակայն պետք է նշեմ, որ աշխատանքային խումբը լավատես է այս առումով: Օրակարգը դեռ ձևավորված չէ, այսօր մտքերի փոխանակում է տեղի է ունեցել»,- նշեց նա:
«Առաջին լրատվականի» հարցին՝ թե հաջորդ հանդիպումը ե՞րբ կլինի՝ Դ.Հարությունյանը պատասխանեց. «Հաջորդ հանդիպման մասին մենք կհայտնենք՝ համատեղ քննարկման արդյունքում»:
Դ.Հարությունյանը նշեց. «Առաջին և ամենակարևոր հարցերից մեկը դա քաղաքական մրցակցության փոխադարձ ընդունելի կանոնների ընդունումն է, կանոնների, որոնք հնարավորություն կընձեռեն մեզ, մեր հասարակությանը ավելի քաղաքական դաշտում գործել, և այդ առումով նաև բարձրացնելու վստահությունը քաղաքական գործընթացների նկատմամբ»:
«Առաջին լրատվականի» հարցին, թե արտահերթ ընտրությունների հարցը արդյո՞ք քննարկվել է այսօրվա հանդիպմանը՝ Դ.Հարությունյանը նկատեց. «Բնականաբար ընդդիմությունը ներկայացրեց իր դիրքորոշումը»,- ապա հավելեց. «Մենք որևէ սահմանափակում չունենք որևէ հարց չքննարկելու հետ կապված»:
