Ոստիկանությունը բերման էր ենթարկել Ռուբեն Հայրապետյանին՝ ապօրինի զենք-զինամթերք պահելու կամ կրելու կասկածանքով, իսկ այնուհետև ազատ էր արձակել, քանի որ երեք զենքերն էլ օրինական են եղել: Այժմ ակտիվորեն քննարկվում են ՀՖՖ նախկին նախագահ Ռուբեն Հայրապետյանի պահվածքն ու հայտարարությունները: Թեմայի շուրջ զրուցելու համար «Առաջին լրատվական»-ը հյուրընկալել է քաղաքագետ Ռոբերտ Ղևոնդյանին և ԱԺ «Իմ քայլը» խմբակցության պատգամավոր Անուշ Բեղլոյանին:
Անդրադառնալով ոստիկանության գործողություններին՝ Անուշ Բեղլոյանը նշեց. «Այս դեպքը քննարկվում է սոցցանցերում և որոշ լրատվամիջոցներում: Մինչդեռ ժողովրդավարական, այսպես կոչված, նորմալ երկրներում այդպիսի հրավերները ընդհանուր պրակտիկայի մի մաս են: Եվ ցավալի է, որ մեզ մոտ դեռևս այդպիսի երևույթները կարող են քաղաքականացվել, և դրանց ավելի շատ նշանակություն է տրվում, քան իրականում գոյություն ունի»:
Մեր զրուցակցի կարծիքով՝ հանրային կյանքի համար ավելի հատկանշական և կարևոր են երկրում տեղի ունեցող զարգացումները, ավելի գլոբալ պրոցեսները:
Ռոբերտ Ղևոնդյանն էլ կարծում է, որ ճիշտ կլիներ, եթե գործըթացը իրավական ընթացք ունենար և ոչ՝ քաղաքական. «Սակայն պետք է հաշվի առնել, որ այն մարդիկ, ովքեր հակոտնյա են այսօրվա իշխանությանը, հակոտնյա են Փաշինյանի կառավարությանը, նրանք գործում են իրենց համակարգված որոշակի տրամաբանության մեջ, որը բավականին հստակ և հասկանալի է: Նրանք փորձում են դիվիդենդներ ստանալ ցանկացած այն քայլից, որտեղից հնարավոր է, և դա նրանց մոտ բավականին լավ է ստացվում»:
Հարցազրույցն ամբողջությամբ՝ տեսանյութում:
