Ազգային անվտանգության ծառայությունը կաշառք պահանջելու և ստանալու կասկածանքով ձերբակալել է ՊԵԿ պաշտոնյաների: Վերջին օրերին ԱԱԾ այդօրինակ բացահայտումների և ձերբակալությունների մասին տեղեկատվությունը բավականին աշխուժացել է:
Դա հատկանշական է թերևս երկու հանգամանքի ֆոնին: Շաբաթներ առաջ ԱԱԾ աշխատակցի օրվա առիթով Նիկոլ Փաշինյանը կառույցում էր և իր ելույթում հայտարարեց, որ ԱԱԾ-ն վայելում է իր վստահությունը, ու դա առնչվում է անգամ նախահեղափոխական շրջանի գործունեությանը:
Դրան զուգահեռ՝ խորհրդարանում ընդունվեց օրենք, որը փաստորեն խախտում էր ԱԱԾ կարևոր մենաշնորհներից մեկը՝ գաղտնալսման մենաշնորհը: Եթե նախկինում միայն ԱԱԾ-ն ուներ դրա հնարավորությունը, կամ միայն ԱԱԾ թույլտվությամբ գաղտնալսում կարող էր իրականացնել նաև ոստիկանությունը, ապա նոր օրենքի համաձայն՝ ոստիկանությունն էլ, ինչպես ԱԱԾ-ն, գաղտնալսում իրականացնելու համար պետք է ունենա միայն դատարանի թույլտվություն: Այդպիսով, ոստիկանությունն «անկախացավ» ԱԱԾ-ից, ինչը նշանակում է ոչ միայն ոստիկանության գործունեության էֆեկտիվության կամ օպերատիվության աճի հնարավորություն՝ եթե օպերատիվ կարիքների համար գաղտնալսում իրականացնելու համար, օրինակ, ոստիկանությունը կանի մեկ գործողություն պակաս, կարիք չի ունենա, դատարանից բացի, նաև ԱԱԾ-ին դիմել, այլև դե ֆակտո հնարավորություն ինչ-որ իմաստով վերահսկելու նաև ԱԱԾ գործունեությունը: Այդ օրենքի ընդունման ֆոնին էլ վարչապետը իր վստահությունը հայտնեց ԱԱԾ-ին՝ ըստ ամենայնի ԱԱԾ դժգոհությունը մեղմելու համար:
Ահա այդ պայմաններում էլ բավականին աշխուժացավ ԱԱԾ բացահայտումների մասին տեղեկատվության հոսքը, ինչը կարող է լինել մի կողմից՝ կառույցի արձագանքը վարչապետին՝ վստահության մասին հայտարարությանն ի պատասխան, մյուս կողմից՝ որոշակի պատասխան իրավապահ համակարգում ուժերի նոր հարաբերակցության ձևավորման՝ ոստիկանության նոր հնարավորության համատեքստում:
Էապես աշխուժացնելով բացահայտումների տեմպը՝ Ազգային անվտանգության ծառայությունն ըստ ամենայնի փորձում է իրավապահ համակարգում ցույց տալ իր դերի և դիրքի գերակայությունը՝ անկախ գործառութային լծակների հարցում տեղի ունեցած որոշակի վերադասավորումից և գաղտնալսման հարցում ԱԱԾ մենաշնորհի փաստորեն չեղարկումից:
Լուսանկարը՝ Armeniasputnik-ի
