ՀՀ նորանշանակ վարչապետ Հովիկ Աբրահամյանն այսօր կառավարությունում պարտադիր կուտակային կենսաթոշակային համակարգի հարցով քննարկման էր հրավիրել Ազգային ժողովի բոլոր խմբակցություններին: Հանդիպմանը եկել էին ԱԺ բոլոր խմբակցությունների ներկայացուցիչները՝ բացառությամբ Հայ ազգային կոնգրեսի:
Հանդիպումից հետո ՀՅԴ պատգամավոր Արծվիկ Մինասյանը լրագրողներին տեղեկացրեց, որ քաղաքական ուժերը ներկայացրել են իրենց տեսակետները, և առաջիկա երկու օրերի ընթացքում կլինի կառավարության նախագիծը. «Շատ ենք կարևորում այն, որ վարչապետը պատրաստակամ է խնդիրները լուծել:
Կառավարությունը պատրաստ է կասեցնել կուտակային կենսաթոշակների մասին օրենքի պարտադիր բաղադրիչը: Խնդիրը երկու փուլի է բաժանված. առաջին փուլում պետք է վերականգնվի հասարակության վստահությունը, համակարգային տարրերը պետք է ենթարկվեն այնպիսի փոփոխությունների, որոնք թույլ կտան քաղաքացիներին իրենց կամքով մասնակցել համակարգին: Չի լինելու պարտադրանք, չի լինելու տույժ ու տուգանք:
Երկրորդ փուլը՝ նոր մոդելի մշակումը, ենթադրում է հասարակության տարբեր շերտերի ներգրավում: Դա պահանջում է ավելի երկար ժամանակահատված և այլ քննարկման հարց է»:
Մինասյանի խոսքով՝ քանի դեռ նախագիծը չկա, վերջնական ոչինչ ասել չեն կարող. «Մեր դրական ֆոնով ավարտված քննարկումը վերջնականապես կարտացոլվի նախագծում»:
Մինասյանը մեկ անգամ ևս ընդգծեց՝ քանի դեռ չկա կառավարության նախագիծը, չեն կարող ասել, թե այդ թեմայով արտահերթ նիստ հրավիրելու գաղափարը ուժի մե՞ջ է, թե՞ ոչ:
Նա անդրադարձավ նաև Հովիկ Աբրահամյանի կողմից իրականացված վերջին քայլերին և ասաց. «Ես կարծում եմ՝ Սահմանադրական դատարանի որոշումը ավելի խորությամբ է ընթերցել, և հասարակության ընդվզումն այս հարցում ու պարոն Աբրահամյանի բազմիցս հնչեցրած ցանկությունը համատեղվեցին: Դրան գումարվեց նաև ոչ իշխանական ուժերի պատրաստակամությունը՝ համագործակցելու հարցը լուծելու ուղղությամբ»:
Հարցին՝ արդյոք Հովիկ Աբրահամյանը խնդրե՞լ է իրենց նախաձեռնությունը, Արծվիկ Մինասյանն ասաց. «Բնականաբար՝ այո, բայց մենք կքննարկենք հարցը և կունենանք կառավարության նախագիծ»:
