Грузия Online-ի փոխանցմամբ՝ Վրաստանի Գերագույն դատարանը հայտնել է, որ այս տարվա առաջին հինգ ամիսներին դատարաններում աճել է որպես խափանման միջոց ոչ բանտային պատժամիջոցների նշանակման ցուցանիշը։ Խոսքը գրավի դիմաց ազատ արձակվելու մասին է։
Եթե 2010 թվականի առաջին հինգ ամիսներին կալանքը՝ որպես խափանման միջոց, կիրառվել է հարուցված գործերի 53.3 տոկոսի դեպքում, իսկ գրավի դիմաց ազատման տոկոսը կազմել է 45.6, ապա 2011 թվականի առաջին հինգ ամիսներին այդ ցուցանիշները համապատասխանաբար կազմել են 47.8 և 52 տոկոս։
Հիշեցնենք, որ 2011 թվականի ապրիլին Վրաստանի բանտարկյալների ընդհանուր թիվը եղել է 22,193, որոնցից 162-ը անչափահաս են, իսկ 1000-ը՝ կանայք։
Ի դեպ, 2010 թվականին Վրաստանի բանտարկյալների թիվը եղել է 23,800-ից ավելի։
