Ֆինլանդիայի բնակիչ Ռիստո Մատիլան զբոսանքի ժամանակ տարօրինակ առարկաների է հանդիպել, որոնք ծածկել էին Բալթիկ ծովի ամբողջ ափամերձ տարածքը Հայլուոտո կղզում: Դրանք ձվի նման օվալաձև սառցե կազմավորումներ էին: Տղամարդը համապատասխան լուսանկարներ է հրապարակել Instagram-ում:
Մատիլայի խոսքերով, ծովի անմիջական հարևանությամբ ապրելու 25 տարիների ընթացքում նա երբեք նման բան չի տեսել, հայտնում է «Զվեզդա» հեռուստաալիքը:
«Ես և կինս կանգնած հիանում էինք բնության հիասքանչ երևույթով: Ես ինձ հետ տեսախցիկ ունեի, և որոշեցի նկարել այդ անսովոր տեսարանը սերունդների համար»,- գրել է նա:
Ֆինլանդիայի օդերևութաբանական ինստիտուտի մասնագետ Ջունի Վայնիոն նշել է, որ նման երևույթ ծայրաստիճան հազվադեպ է հանդիպում: Որպեսզի օվալաձև սառցե գնդեր կազմավորվեն, անհրաժեշտ է միանգամից մի քանի գործոնի համընկնում. ջրի և օդի ջերմաստիճանը, քամու արագությունը, ավազե, այլ ոչ թե խճապատ լողափը, ինչպես նաև մակընթացությունների և տեղատվությունների որոշակի պարբերականությունը:
«Չափազանց ուժեղ քամին կխանգարեր գնդերի ձևավորմանը: Բայց, մյուս կողմից, եթե այն հանգիստ է, ապա ջուրը պարզապես կսառչի լողափին հավասարաչափ շերտով»,- բացատրել է նա yle.fi պորտալում:
Վայնիոն հավելել է, որ սովորաբար «սառցե ձվերը» հայտնվում են գիշերը, իսկ առավոտյան արդեն անհետանում են:
