«Առաջին լրատվական»-ի զրուցակիցն է ԱԺ անկախ պատգամավոր Արման Բաբաջանյանը
– Պարոն Բաբաջանյան, ԱԺ ՀՀԿ-ական նախկին պատգամավոր Խոսրով Հարությունյանը դատի է տվել Ձեզ՝ պահանջելով ներողություն խնդրել այս տարվա ապրիլի 18-ին ԱԺ-ում Ձեր հնչեցրած մի հայտարարության համար, որով Դուք դիմելով ՀՀ Հանրային ծառայությունները կարգավորող հանձնաժողովի նախագահի պաշտոնում առաջադրված թեկնածու Գարեգին Բաղրամյանին, հետաքրքրվել էիք, թե արդյո՞ք որեւէ ձեւով ընդվզել է, երբ նախկինում ՀԾԿՀ-ն տվել է ՀԷԿ-երի եւ ջրային ռեսուրսների կառավարման արտոնագրեր տարբեր նախկին պաշտոնյաներին, այդ թվում նշելով նաեւ Խոսրով Հարությունյանի անունը:Դատական նիստը կայանալու է հոկտեմբերի 17-ին: Պատրաստվո՞ւմ եք արդյոք ներողություն խնդրել, թե՞ դատարանում փորձելու եք հիմնավորել Ձեր հայտարարությունները:
– Բնականաբար, չեմ պատրաստվում ներողություն խնդրել, բացի այդ՝ Խոսրով Հարությունյանը այն անձը չէ, ով վաստակել է որևէ մեկից, այդ թվում՝ ԱԺ պատգամավորից ներողություն պահանջելու իրավունք: Խոսրով Հարությունյանն ինքը իմ հայտարարությունները հերքող որևէ հիմնավորում չի ներկայացնում՝ խնդիրը լղոզելով պաթետիկ ու բարոյախրատական տեքստերով:
– Իր վերջին հարցազրույցում Խոսրով Հարությունյանը խոսել է Ձեր անցյալից, բանակում ծառայած չլինելու հանգամանքից ու հայտարարել է, որ Դուք մարդկանց մեղադրելու բարոյական իրավունք չունեք:
– Խոսրով Հարությունյանը կարող է խոսել ամեն ինչից, բայց ոչ երբեք՝ բարոյականությունից: Այդ մարդու քաղաքական կարիերան կառուցված է եղել բոլոր ժամանակների իշխանությանը հեզորեն ծառայելու ու սպասարկելու սկզբունքի վրա, ինչի շնորհիվ Խոսրով Հարությունյանը դարձել է հսկայական հարստության տեր՝ վարձատրություն ստանալով, կրկնում եմ, բոլոր ժամանակների իշխանություններից: Բարոյականության մասին բառ իսկ ասելու իրավունք չունի մեկը, ով ղեկավարելով Քրիստոնեությունը որպես պետական կրոն ընդունելու 1700 ամյակի կազմակերպման հանձնաժողովը՝ այն վերածել էր շահութաբեր բիզնեսի, քրիստոնեությունը դարձրել էր փող աշխատելու միջոց: Եվ ընդհանրապես՝ Խոսրով Հարությունյանը նախկին հանցավոր համակարգի ամենակարկառուն ու նշանային ներկայացուցիչներից մեկն է, ով իշխանությանը մատուցած ծառայությունների համար պարգևատրվել է ոչ միայն նյութապես, այլ նաև ընտանիքի անդամների բարձր կարգավիճակներով, դիվանագիտական համակարգը տարիներ շարունակ եղել է և կա նրա ուստրերի ու դուստրերի կարիերայի հնարավորությունը: Ինչ վերաբերում է իմ հասցեին նրա հնչեցրած մեղադրանքներին, ապա Խոսրով Հարությունյանը ամբողջությամբ կրկնում է քոչարյանասերժական իշխանությունների հորինած սուտն ու կեղծիքը իմ մասին, նա այսօր էլ շարունակում է հանրապետական քարոզչության մաս կազմել: Երբեմնի նախկին վարչապետն այսպիսով այսօր վերածվել է հանրապետական քարոզչության գործիքի: Հիրավի դառը ճակատագիր:
