Իսրայելցի քաղաքական գործիչ, քաղաքագետ Ավիգդոր Էսկինը կարծում է, որ Թուրքիայի ներխուժումը Սիրիա Հայաստանի և Իսրայելի համագործակցության համար լայն հնարավորություն է ստեղծում: «Առաջին լրատվական»-ի հետ զրույցում Էսկինը նկատեց. «Սիրիայում տեղի ունեցող վերջին իրադարձությունները վկայում են այն մասին, որ միջազգային հանրությունը Հայաստանի հանդեպ անարդար է: Եկել է ժամանակը գիտակցելու, թե Հայաստանն ինչ յուրահատուկ դրական դերակատարում ունի տարածաշրջանում»:
Ըստ մեր զրուցակցի՝ այժմ լավ պահ է աշխարհի բարի կամքի տեր մարդկանց բացատրելու, թե որքան կարևոր է, որ հայերը վերահսկեն Արցախի բոլոր շրջանները: «Ես դա այսօր համարում եմ տարածաշրջանային կայունացնող գործոն»,- ասաց Էսկինը:
Ավիգդոր Էսկինի խոսքով՝ սկզբում Իսրայելում և առաջատար այլ երկրներում պետք է հասկանան Հայաստանի հսկայական նշանակությունն ու դերակատարությունը տարածաշրջանում. «Հենց Հայաստանն է իր վրա կրում ադրբեջանցի ծայրահեղականներին, և հենց Հայաստանն ու Արցախն են իրենց գոյությամբ երաշխավորում խաղաղություն»:
Մեր հարցին՝ արդյոք Հայաստանը պե՞տք է հիմա կոնկրետ քայլեր ու գործողություններ իրականացնի Իսրայելի հետ համագործակցության համար, Էսկինը պատասխանեց. «Անկասկած: Հայաստանը պետք է օգտագործի այս պահը ամբողջ աշխարհին բացատրելու, թե ինչ ագրեսիվ քաղաքականություն է իրականացնում Թուրքիան, և թե Հայաստանն ինչ դերակատարություն ունի տարածաշրջանի մարդկության պահպանման հարցում»:
Հետաքրքրվեցինք նաև՝ արդյոք Հայաստանի և Իսրայելի համագործակցությունը չի՞ վնասի Իսրայել-Ադրբեջան հարաբերություններին, ինչին ի պատասխան՝ Էսկինն ասաց. «Իսրայելի ու Ադրբեջանի միջև պրագմատիկ հարաբերություններ են, որոնք երկուստեք ձեռնտու են: Դա վերաբերում է Իրանին, նաև՝ Իսրայելին նավթ վաճառելուն և Իսրայելից զենք գնելուն: Բայց դրա հետ մեկտեղ Բաքուն Իսրայելի քաղաքական հակառակորդն է: Ադրբեջանն, օրինակ, հրաժարվում է Իսրայելում դեսպանատուն բացել այնքան ժամանակ՝ մինչև մեր տարածքում չստեղծվի Պաղեստին կոչվող արաբական պետությունը: Իսկ Հայաստանն այսօր պատրաստ է երկխոսության ու քաղաքական համագործակցության»,- եզրափակեց նա:
