Աղետների ռիսկի նվազեցման (ԱՌՆ) ոլորտում Հայաստանը համաշխարհային զարգացումներում բավական լուրջ ներդրում ունի, ինչի վկայությունն է դարձել ապրիլի 1-3-ը Ալմաթիում տեղի ունեցած տարածաշրջանային խորհրդաժողովը:
Խորհրդաժողովին Հայաստանը ներկայացրել է մեր ձեռքբերումները ԱՌՆ ոլորտում, նաև իր առաջարկները: Դա կազմակերպվել էր Հյոգոյի գործողությունների ծրագրի շրջանակում: 2015-ից Հյոգոյի գործողությունների ծրագիրը կավարտվի, և ամբողջ աշխարհը նախապատրաստվում է 2015-ին հաջորդող տասնամյակին, թե ինչ ուղղությամբ պետք է զարգանա աշխատանքը: Այս մասին լրագրողների հետ հանդիպմանը տեղեկացրեց ԱԻՆ փրկարար ծառայության տնօրենի տեղակալ, գեներալ-մայոր Նիկոլայ Գրիգորյանը:
Վերջինս թվարկեց նաև այն ձեռքբերումները, որ ունի մեր երկիրը. Հայաստանը տարածաշրջանում առաջիններից է, որ ստեղծել է ԱՌՆ ազգային պլատֆորմ, մշակել ԱՌՆ ազգային ռազմավարություն: Հայաստանն իր հայացքն ուղղել է դեպի անգամ հեռավոր համայնքներ:
«Ունենք ճգնաժամային տարածաշրջանային կենտրոն, որը տարածաշրջանում լավագույններից է, 911 ծառայությունը միջազգային ճանաչում ունի»,- ասաց Ն. Գրիգորյանը:
ԱԻՆ ճգնաժամային կառավարման պետական ակադեմիայի ռեկտոր Համլետ Մաթևոսյանը, ներկայացնելով խորհրդաժողովին Հայաստանի ներկայացրած առաջարկություննրը, նշեց, որ ամենամեծ նորությունն այն էր, որ իրենք շեշտը դրել են բնակչության շերտերի բաժանման վրա, և յուրաքանչյուր խոցելի շերտն ինքն է թելադրելու մատուցվող նյութերն ու մեթոդաբանությունը: Կարևորվել է նաև երեխայի՝ վաղ հասակից ուսուցանումը, որ մարդը պատրաստ լինի նվազեցնել աղետների առաջացման ռիսկերը, այլ ոչ թե վերացնի աղետների հետևանքները:
«Կյանքը ցույց տվեց, որ միայն ուսուցանել մարդուն՝ ինչպես պահել երկրաշարժից առաջ ու հետո, արդյունավետ չէ: Մարդուն տեղափոխում ենք աղետներից առաջ, սովորեցնում ենք արտակարգ իրավիճակների ու ռիսկերի նվազեցման ամբողջ փիլիսոփայությունը, որ մարդ իմանա՝ ինչպես իրեն պահի, որ զոհեր քիչ լինեն»,- նշեց բանախոսը:
Աղետների ռիսկի նվազեցման ազգային պլատֆորմի տնօրեն Մովսես Պողոսյանն էլ նշեց, որ «որքան ծախսը տեղափոխվի դեպի աղետների ռիսկի նվազեցում՝ կանխարգելում, տասնապատիկ, հարյուրապատիկ կշահենք՝ տուժածներ ու տառապանքներ չունենալով»:
Նրա խոսքով՝ մարդու ուսուցումը պետք է սկսվի մանկապարտեզից, պետք է մարդուն նախապատրաստենք աղետներից առաջ:
«Մնալ ինչ-որ մեկի հույսին, որ գալու է ու ձեզ փրկի՝ երկիրը դրան պատրաստ չէ: Մինչ գան փրկարարները, կանցնի առնվազն 15 րոպե: Բավական է 5 րոպե, որ մարդը մահանա: Հեշտ է ասել պետությանը՝ արի ու մեզ փրկի»,- ասաց վերջինս՝ նշելով յուրաքանչյուր անհատի ուսուցման կարևորությունը:
Լուսանկարը՝ Photolure-ի
