Թուրքիայում մարտի 30-ին տեղի ունեցած տեղական ինքնակառավարման մարմինների ընտրություններն անցան բազմաթիվ խախտումներով: Չնայած տարբեր սոցիոլոգիական հարցումներին, որտեղ վարչապետ Ռեջեփ Էրդողանի ղեկավարած «Արդարություն և զարգացում» կուսակցությունը վարկանշային առումով զիջում էր մյուս կուսակցություններին, այնուամենայնիվ, հենց վարչապետի կուսակցությունն էլ բազմաթիվ խախտումներով հաղթանակ տարավ ՏԻՄ ընտրությունների ժամանակ:
«Ակոս» թերթի հայկական բաժնի խմբագիր Բագրատ Էստուկյանն «Առաջին լրատվական»-ի հետ զրույցում ասաց, որ մոտավորապես 30 կուսակցություն մասնակցեց տեղական մարմինների ընտրություններին, չորս կուսակցություն ձայների 93 տոկոսը ստացավ: Այդ չորս կուսակցություններն են՝ իշխող AKP կուսակցությունը՝ 44,9 տոկոս, երկրորդ կուսակցությունը ժողովրդահանրապետականն է, այնուհետ՝ «Ազգայնական շարժում» կուսակցությունը՝ 18,4 տոկոս, և քրդական «Խաղաղություն և ժողովրդավարություն» կուսակցությունը՝ 4,8 տոկոս:
Նրա խոսքով՝ այս կուսակցությունները ներկայանում են իրենց ազգային և կրոնական պատկանելությամբ. մեկը իսլամի պաշտպանն է, մյուսը՝ թուրքական պետության, երրորդն էլ քուրդ ժողովրդի պաշտպանն է: Ավելին՝ Բագրատ Էստուկյանի խոսքով, այստեղ տնտեսական նոր ծրագիր չկա, և այս ընտրություններն ապագայի նկատմամբ հուսադրող չեն:
Նրա խոսքով ՝ այս ընտրություններին չորս կուսակցությունների մեջ էլ հայ թեկնածուներ կային, սակայն զավեշտալի էր, թե իսլամի ջատագով հանդիսացող կուսակցության մեջ հայն ի՞նչ գործ ուներ, կամ թուրքական ազգային կուսակցության մեջ հայն ի՞նչ գործ ուներ:
Հայերը, նրա խոսքով, հիմնականում մասնակցեցին ժողովրդահանրապետական կուսակցությունում, թեև այն քրդական ուղղությամբ է գործում, բայց հեռանկարում նպատակը ժողովրդավարություն հաստատելն է. «Թուրք ազգայանական կուսակցության շարքերից ներս մի քանի անդամ քաղաքային խորհրդի անդամ դարձավ, և նրանցից ոչ մեկը քաղաքապետ չդարձավ. մի քանիսը հաճոյացան այդ խորհրդի մաս կազմելուն»,- ասաց նա:
«Հայերը շատ կարևոր ներկայություն չունեն, կարևոր ներկայությունը միայն Մարդին քաղաքի մեջ է. ասորի կին քաղաքապետ ընտրվեց»,- ասաց նա՝ հավելելով, որ ընտրությունները միշտ խախտումներով են անցնում, և վերջինում էլ բացառություններ չեղան: «Ընտրությունների օրը իբրև թե քվեաթերթիկներ կորցրին, հոսաքազրկվեցին տեղամասերը, որոշ քաղաքներում անվստահություն կա քվեաթերթիկների հաշվարկի հետ կապված, հիմա վերահաշվարկ է տեղի ունենում»,- ասաց Բագրատ Էստուկյանը՝ նշելով, որ եթե այսօր Էրդողանը հայտարարի նախագահի իր թեկնածությունը պաշտոնապես առաջադրելու մասին, կընտրվի: Թեև Գեզի այգու շուրջ ծավալված իրադարձություններից հետո Էրդողանի վարկանիշն ընկել է, այնուամենայնիվ, նա դեռ վարկանիշ ունի. «Առևտրի կենտրոն էր ուզում սարքել այգու տարածքում, ժողովուրդը պայքարեց, ասաց՝ քո գործը իմացիր»:
Բագրատ Էստուկյանի դիտարկմամբ՝ ընտրված թեկնածուները Ստամբուլի քաղաքային կյանքում ոչինչ չեն կարող փոխել, քանի որ Ստամբուլի քաղաքապետը Էրդողանն է: «Թուրքիայի վարչապետին նաև Ստամբուլի քաղաքապետ են կոչում»,- հավելեց նա:
