Օրերս Արցախում կայացան ՏԻՄ ընտրություններ, որոնք անկախ Արցախի պատմության ընթացքում արդեն յոթերորդն էին։ Ընտրություններին հետևում էին շուրջ 200 դիտորդներ, ինչպես նաև լրատվամիջոցներ։
Դուք ևս գտնվում էիք Արցախում, ինչպիսի՞ն են ձեր դիտարկումները ընտրությունների ընթացքի վերաբերյալ․ «Առաջին լրատվական»-ի հարցին պատմաբան Վահրամ Թոքմաջյանը պատասխանեց․ «Պետք է նշեմ, որ որոշ շրջանակներ ամեն ինչ արեցին՝ այս ընտրությունների շուրջ անառողջ մթնոլորտ ստեղծելու, աղմուկ-աղաղակ բարձրացնելու՝ դիտորդական առաքելություններին հարվածելու նպատակով։ Բայց ենթատեքստում իրական թիրախն Արցախն էր։ Այսինքն՝ հարվածելով դիտորդական առաքելություններին և այդ անառողջ աղմուկն ընտրությունների շուրջ ստեղծելով, իրենք չէին հարվածում միայն դիտորդական առաքելություններին։ Ի փառս ընտրողների և ընտրության կազմակերպիչների՝ ամեն ինչ անցավ ավելի լավ, քան ես կարծում էի։ 2003-04 թվականներից ես ընտրական գործընթացների մեջ եմ՝ տարբեր կարգավիճակներով։ Այն մշակույթը, այն միջավայրը, որ կար այս ընտրական գործընթացներում, ինձ լիովին գոհացրեց։ Իհարկե, չենք կարող ասել, որ խնդիրներ չկային․ Ընտրական օրենսգրքի բացերը, հանձնաժողովականների չիմացությունը։ Բայց դրանք կարգավորվող խնդիրներ են։ Այն ամենը, ինչ մենք 1995‑2017 թվականներին սովոր ենք եղել տեսնել Հայաստանում, Արցախի ՏԻՄ ընտրություններում իսպառ բացակայում էր, և խնդիրների առաջացման մեծ մասը կամ չիմացության արդյունք էին, կամ Ընտրական օրենսգրքի բացերը»։
«Ներքաղաքական դիրքավորման առումով, այո, եղել են փոփոխություններ՝ ուժերի հարաբերակցությունների փոփոխություն։ Այսինքն՝ իշխող ուժը հեռացել է իշխանությունից, և անգամ տեղ չունի խորհրդարանում, իսկ ընդդիմադիր ուժը, որը նախկինում խորհրդարանական ընդդիմություն էր, եկել է իշխանության։ Մյուս կողմից՝ ես կուզեի տեսնել նոր ուժեր, որոնք ծնվեցին որպես արդյունք հեղափոխության։ Օրինակ՝ «Քաղաքացու որոշում»-ն ունի որոշակի պոտենցիալ՝ դաշտում ինչ-որ դեր ունենալու։ Հիմա, որ Աշոտյանը խոսում է, այսինքն՝ դեռ կարողանում է խոսել, դա նաև ՔՈ-ի պրոբլեմն է, որովհետև «Քաղաքացու որոշում»-ը և նրա նման մի քանի ուժեր չեն ծածկում դաշտը, որպեսզի մյուսները չկարողանան խոսել։ Ես դա ցավով եմ ասում։ Այս պահին մենք այդ վակուումն ունենք»,- հավելեց Վահրամ Թոքմաջյանը։
Մանրամասները՝ տեսանյութում։
